Tuir Komunikadu Imprensa ne’ebé www.tempotimor.com asesu iha tersa (21/06) katak, enkontru entre Prezidente Repúblika ho Sekretariu Jerál G7+ ne’e sei ko'alia kona-ba progressu servisu G7+ nian no fahe informasaun kona-ba nasaun membru G7+ sira-nian.

Sekretáriu Jerál G7+, Habib Mayar, sente orgullu no onradu ho prezensa Prezidente Repúblika Horta, iha Kuarter Jerál G7+ ne'e.

Tanba Vizita ne'e iha momentu ida importante atu hetan idea no opiniaun Prezidente Repúblika nian relasiona ho situasaun krize geopolitika ne ebé akontese iha mundu agora.

Vizita ne'e mós hanesan opportunidade hodi rona Xefe Estadu, iha nia kapasidade hanesan Enviada espesiál G7+, fahe hanoin estratejiku hodi ajuda nasaun membru G7+ sira ne'ebé agora dadauk enfrenta hela konflitu, frazilidade no krize umanitária.

Iha tinan 3 liuba, enkontru Ministeriál G7+ ba dala-lima ne'ebé hala’o iha fulan-juñu 2019 iha Lisboa-Portugal, grupu G7+ koletivamente nomeia ona José Ramos Horta nu'udar enviada espesiál G7+ nian.

Husi enkontru ne'ebé hala’o iha nasaun Portugal hetan patisipa husi Ministru Planeamentu, Finansas no Pontu Fokál husi nasaun membru G7+. (*)