Print this page

RHTO Sujere Horta ‘Hamaus’ Governu-PN Ratifika Konvensaun Internasionál EhD

Diretór Ezekutivu RHTO, Joanito dos Santos. Diretór Ezekutivu RHTO, Joanito dos Santos. Foto Suplay

Tempotimor (Dili)-Organizasaun Raes Hadomi Timoroan (RHTO) sujere Prezidente Repúblika (PR), José Ramos Horta, atu hamaus Governu no Parlamentu Nasionál (PN) aselera lalais ratifikasaun ba konvensaun internasionál direitu ba Ema ho Defisiénsia (EhD) hodi proteje direitu ema ho defisiénsia iha Timor-Leste.

“Ohin, ami ekipa mai hasoru malu ho Prezidente Repúblika hodi aprosima ba asuntu ratifikasaun konvensaun internasionál direitu ba ema ho defisiénsia ne’ebé to’o agora Governu seidauk ratifika, maske iha ona kompromisu maibé adia hela. Prezidente Repúblika nia resposta sente ratifikasaun konvensaun ne’e presiza tenke aselera no ratifika lalais tanba lori tempu naruk ona, nune’e bele proteje liután ema ho defisiénsia sira”, dehan Diretór Ezekutivu RHTO, Joanito dos Santos, hafoin audénsia ho PR Horta iha Palásiu Prezidensiál, Bairropite, kuarta (15/06).

Ba Preokupasaun hirak ne’e Prezidente Repúblika rasik mós fó atensaun maka’as no nia promete sei husu ba parte asesór legál prepara karta jurídiku ida iha tempu badak sei hato’o ba Governu no Parlamentu Nasionál hodi aselera lalais ona prosesu ratifikasaun refere.

Aleinde ba kestaun Konvensaun, RHTO mós informa ba Xefe Estadu kona-ba aprosimasaun primeiru ligasaun ema ho defisiénsia ba bee no saneamentu no ijiéne ne’ebé mak inkluzivu, no bee ne’e direitu umanu ne’ebé mak fundamentu ba ema-nia moris entaun importante tebes katak bee ba ema hotu.

“Entaun ho deklarasaun ida-ne’e ami uza hodi halo advokasia ne’ebé iha situasaun direitu umanu liga ba bee, ema ho defisiénsia, jéneru feto no mane, sempre kuru bee ho distánsia dook mezmu sira hetan violasaun”, esplika nia.

Tanba ne’e, husu nafatin apoiu husi Prezidente Repúblika hodi hato’o ba ezekutivu haree asuntu bee ba ema hotu no oinsá aloka orsamentu ba área ida-ne’e.

Enkuantu audénsia ho Xefe Estadu ne'e, partisipa husi ekipa plataforma nasionál bee no saneamentu no ijiéne, RHTO, Yayasan HAK, Water Aid, Klíbur Defisiénsia Tilun, no Sentru Dezenvolvimentu Inkluzivu. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items