Tuir informasaun ne’ebé www.tempotimor.com asesu iha pájina MAE, kinta (16/06) katak, Vise Ministru Administrasaun Estatal, Lino De Jesus Torrrzão hatete, iha desentralizasun ne'e iha faze datoluk (3), ida Desentralizasaun Administrativa, Desentralizasaun Institusionál, no ikus liu Desentralizasaun Territoriál.
Bainhira atu haka'at ba Desentralizasaun territoriál haka'at liu ona fase rua, hanesan faze ne’ebé halo dadaun no segundu institusionál, iha ikus mak kompeténsia.
Ba Ministériu sira ne'ebé mak Desentralizadu ona ne'e tenke deskonsentra hotu ba Munisípiu, ezemplu hanesan Ministériu Edukasaun entrega ona ba Munisípiu sira mak hanesan Eskola Presekundária, Merenda Eskolar, Eskola Bázika, no Saúde, tuir kompeténisa.
Dadaun ne’e ba Ministériu ne'ebé mak seidauk entrega ne'e Ministériu Administrasun Estatál sei halo negosiasaun ho Ministériu relevante atu produz diploma konjunta, liuhusi diploma konjunta ne'e mak sei produz fali Kontratu Administrativu Interogativu (CAI), atubele halo kompoténsia ba Munisípiu hotu.
“Ataúru sai hanesan Munisípiu Espesiál tanba Posto Administrativu laiha Munisípiu bele halo servisu direitamente ba Xefe Suku na’in-lima (5) iha ne'e depois mak sei ba to'o iha suku. Iha Desentralizasaun Territoriál mós iha ona nia baze fundamentál mak lei poder-lokál. Ho nune'e imi hotu bele hili rasik imi-nia lideransa, Autroridade iha Munisípiu. Ba oin imi lapresiza atu ba tan Dili ona imi rasik mak sei kaer imi-nia kuda talin”, dehan Vise Ministru Lino Torezão, iha salau Administrasaun Munisípiu Ataúro.
Iha ne’e Vise Ministru mós fó parabéns ba komunidade sira hotu, tanba hetan ona mehi ne'ebé mak durante ne'e seidauk hetane agora realiza ona Ataúru sai hanesan Munisípio ida.
Iha serimónia refere partisipa husi Administradór Munisípiu Ataúru, Reprezentante Direitór Jerál Sekretariadu Tékniku Administrasaun Eleitorál (STAE), Komisáriu Komisaun Nasionál ba Eleisaun sira (CNE), Direitór Sekretariadu Tékniku Administrasaun Eleitorál (STAE) Munisípiu Ataúru inklui entidade sira hotu iha Munisípio refere. (*)
