“Projetu dekretu-lei ida-ne'e nia objetivu mak atu hadi’a aspetu oioin husi atuál Rejime Jurídiku ba Estabelesimentu Ensinu Superiór (RJEES) nian, ne’ebé estabelese husi Dekretu-Lei númeru 8/2010, loron 19 fulan-maiu”, dehan Ministru Prezidensia Konsellu Ministru (MPKM), Fidelis Manuel Leite Magalhães, iha auditóriu Ministériu Finansas, Aitarak-Laran, kuarta (15/06).
Ba aprovasaun ba projetu dekretu-lei ne'ebé aprezenta husi Ministru Ensinu Superior Siénsia no Kultura (MESSK), Longuinhos dos Santos, entre alterasaun sira ne’ebé introdús, destaka aplikasaun konkreta husi rejime jurídiku kurríkulu padraun nasionál nian ba ensinu superiór, ne’ebé tama ona iha vigór iha Timor-Leste liuhusi Dekretu-Lei númeru 3/2022, loron 12 fulan-dezembru no konsolidasaun konseitu bináriu sistema ensinu superiór nian.
Aleinde ida-ne’e mós, introduz ona norma sira kona-ba asosiativizmu estudantíl nian, kona-ba antigu estudante sira, kona-ba apoiu ba estudante sira iha ninia insersaun iha vida ativa no kona-ba figura provedór estudante nian.
Nune’e mós introduz regra sira kona-ba fuzaun, fahe ka transferénsia estabelesimentu sira ensinu superiór privadu nian, kona-ba rekoñesimentu interese públiku husi estabelesimentu sira ensinu superiór no kona-ba fiskalizasaun no inspesaun ba instituisaun sira ensinu superiór nian. (*)