“Iha kestaun ida atu hato'o ba MAE, katak iha suku Samalari iha sekretáriu suku ida, nia kauze tinan tolu ona ema nee la servisu ona iha Suku ida-ne'e, ema ne'e ba tiha ona iha Inglaterra, mais to'o ohin loron ninia saláriu ne'e sei la'o hela”, dehan Deputadu Buka Tuir iha plenária PN, tersa (14/06).
Tanba tuir informasaun ne'ebé hato'o husi komunidade inklui família rasik ba deputadu sira katak Sekretáriu iha Suku Samalari refere ne'e nu’udar sira-nia membru família ida ne'ebé mak ba tiha ona Inglaterra durante tinan tolu ona maibé ninia saláriu kontinua la'o hela.
Ba kestaun ne'e, hamosu dúvida boot ba deputadu PLP tanba ema ne'e laiha ona durante tinan 3, no lá hala'o ninia servisu nu’udar Sekretáriu Suku nian maibé ninia diretu vensimentu ne'e sei la’o nafatin, ida-ne'e se loos mak simu.
“Tuir informasaun katak osan ne'e Xefe suku sira mak utiliza ba atividade seluk mais ne'e mós laloos ona, ne'ebé husu tok klarifikasaun ba ida-ne'e”, hatete nia.
Aleinde iha mós kestaun ida kona-ba funsionáriu kontratadu sira hala'o servisu internamentu husi Ministériu Saúde, ne'ebé destaka ba Railaku hamutuk ema na’in-lima desde fulan-outubru tinan kotuk to'o ohin loron la simu osan, ne'e kestionavel.
“Rajaun ne'e tanba sá, sira-nia kontratu ne'e la'o nafatin e sira empana nafatin sira nia kna’ar iha fatin servisu maibé to'o ohin loron diretu ne'e seidauk hetan”, esplika nia. (*)