“Husu ba Governu tau matan didi’ak ba prosesu ida rekrutamentu ba funsionáriu iha florestal nian tanba ita haree akontese irregularidade barak los iha ne'eba, ema sira ne'ebé liu iha selesaun dulumentu, liután iha teste eskrita iha rezultadu fila la liu, sira balu nein sai kandidatu, nein sai aplikante teki-teki sira-nia naran mosu fali iha rezultadu finál, informasaun sira ne'e husu ba Governu tau atensaun ba ida ne'e”, dehan nia iha Parlamentu Nasionál, tersa (14/06).

Tanba Diresaun Florestal loke rekrutamentu ba Guarda Floresta maibé mosu irregularidade barak tanba kandidatu sira ne’ebé mak naran laiha lista rekrutamentu nian derepenre de’it pasa iha rezultadu finál.

Antes ne’e, Diretór Jerál Florestál no Prezidente Juri ba Rekrutamentu Guarda Florestál ba tinan 2022, Simão Raimundo Mau, konkorda ho Komisaun Anti Korrupsaun (KAK) hodi halo kanselamentu ba rekrutamentu kandidatu Guarda Florestál hamutuk na’in-184 no identifika na’in-ruanulu (20) iha indikasaun irregularidade forte.

Tuir informasaun ne’ebé www.tempotimor.com asesu iha pájina Komisaun Anti Korrupsaun (KAK) asesu iha sábadu (11/06) katak, desizaun suspende prosesu ne’e foti hafoin iha lamentasaun husi públiku ne’ebé iha indikasaun forte kandidatus na’in-20 husi kandidatu 184 ne’ebé liu iha prosesu rekrutamentu ne’e iha indikasaun irregularidades forte.

“Indikasuan irregularidade forte ne’e tuir dokumentu ne’ebé KAK no ekipa kuadrilaterál simu ona kandidatu balun ne’ebé la liu iha teste selesaun dokumentu no eskrita maibé naran sai iha rezultadu finál aprovadu klasifikadu no kontratu asina tiha ona”, hatete nia.

Komisáriu Adjuntu KAK ba Asuntu Prevensaun no Sensibilizasaun, Luis de Oliveira Sampaio katak, la’ós atu halo kanselamentu totál maibé atu defende transparánsia no prosesu rekrutamentu iha Insitituisaun Públiku.

“KAK la impede prosesu rekrutamentu ida ne’e maibé atu defende transparánsia prosesu rekrutamentu iha instituisaun públiku no integridade no naran di’ak membru juri sira-nian. KAK mós labele taka mata ba lamentasaun sira husi públiku ne’ebé sai viral iha mídia sosiál”, Katak Komisáriu Adjunto Luis Sampaio.

Aliende suspende rekrutamentu, husu ba komisaun rekrutamentu atu fornese informasaun mais detallu no dokumentu hotu relasiona ho prosesu rekrutamentu husi inisiu simu dokumentus to’o públikasaun finál naran kandidatu sira-nian mai iha KAK tarde liu loron sesta loraik tuku 5:30 OTL oras servisu nian.

Prezidente Juri no Diretór Jerál Guarda Floresta, Raimundo Mau promote sei kumpri ezijensia KAK nian hodi lori dokumentu hotu relasiona ho prosesu rekrutamentu Guarda Floresta nian ne’ebé sai virál iha mídia sosiál no sai atensaun públiku mai iha edifísiu KAK Farol loron sesta loraik molok tuku 5:30 oras timor-leste.

Xefe Unidade Informasaun no Seguransa, Euclides Madeira, nu’udar unidade servisu sekreta nian iha KAK simu ona informasaun no dokumentu komprovativu balun ne’ebé indika iha duni indikasaun irregularidades durante prosesu rekrutamentu Guarda Floresta ne’ebé ekipa juri komete no sei tuir investigasaun kriminál wainhira dokumentu ne’ebé KAK sei simu iha loraik ne’e komprova.

Alende ne’e, Adjuntu Komisaun Anti Korrupsaun ba assuntu Investigasaun, Augusto Castro hatete, nia parte simu ona informasaun no halo kompilasaun komprovativu dokumentu sira molok halo detensaun ba Diretór Jerál Florestál.

“Sim informasaun ami simu ona no ekipa halo kompilasaun ba dokumentu komprovativu sira depois rezultadu análiza ba dokumentu sira ne'e atu halo asaun sira tuir mai ne’ebé iha labele halo konkluzaun sedu bazeia ba rumoris bazeia ba mídia sosiál maibé Ekipa husi KAK ninian iha ona koñesimentu ba faktu ida ne’e e depois kompilla ba dokumentu komprovativu”, informa nia.

Sorumutu ekipa Kuadrilateral ne’e hala’o iha Salaun sorumutu Diresaun Jerál Floresta nian iha Gabinete Vise-Ministru Agrikultura nia iha Kaikoli-Dili. (*)