“Ami ko'alia nafatin atu halo esforsu hotu atu nune’e karik bele labele kleur liu, mínimu antes de mandatu PN remata, pelu menus ita realiza tiha mehi ne'ebé mak PN ho Governu hakarak. Ami hanoin ohin kedas ami sei ko'alia filafali ho Ministru Justisa atu haree filafali kona-ba rai ne'ebé mak atu atribui ba PN”, dehan Ministru Jerónimo iha plenária PN, tersa (14/06).

Tanba asuntu kona-ba rai ne'e Governu mós laiha impedimentu ruma atu oferese rai ba Parlamentu Nasionál maibé iha Governu iha prinsípiu nafatin konkorda no fó apoiu atu PN realiza duni Konstrusaun ida-ne'e antes termina mandatu.

Dadauk Governu mós nota dalaruma fatin balun mak PN hakarak atu hari’i edifísiu maibé fatin ne’e iha mós edifísiu lubuk ida ne'ebé mak presiza atu aloka sira ba fatin seluk.

“Sé ita la aloka sai sira, ita laiha fatin ba sira, sira labele halo servisu entaun buat ne'ebé mak ita presiza ba rai ida-ne'e automtikamente totál paradu hotu”, afirma nia.

Tanba ne'e, Governu presiza mós tetu molok deside atu nune'e bele iha solusaun ba fatin nomós lori rezultadu di'ak ba PN ho Governu.

“Ne'e mak ami-nia parte ami hanoin ohin kedas ami sei ko'alia filafali ho Ministru Justisa atu haree filafali kona-ba rai ne'ebé mak atu atribui ba iha PN”, informa nia.

Ho ida-ne'e, atu informa ba deputadu sira liliu kona-ba rai, masle halo diskusaun dala barak ona, kona-ba rai ne'e hahú husi tempu dahuluk bainhira atu atribui fatin iha Kaikoli, maibé ikus mai halo fali mudansa, tanba haree ba kondisaun.

“Halo duni aprosimasaun ba PN, atu hili iha Kaikoli, e mós hili sorin balun, hili sorin balun maibé desizaun ikus liu Prezidente PN hakarak ba vizita iha Hera, e hakarak hili mak ida Hera ne'e”, esplika nia.

Aleinde tempu ne'ebá Governu mós hatud fatin lubuk ida, ba PN, iha Aimutin, Komoro nomós iha Aitarak Laran, maibé la konsege fiksu.

Tanba ne'e, Governu rasik rekoiñese buat hotu sempre iha difikuldade barak ne'ebé iha risku nomós iha ninia kustu, tanba nia kustu dalaruma boot liu kompara ho fatin balun ne'ebé mak kustu ne'e naton, atubele realiza Konstrusaun edifísiu PN ba futuru. (*)