Joven Promotor husi Suku Ostiko, Marciana dos Santos Freitas, hatete, asina deklarasaun, tanba iha Timor violénsia hasoru feto no labarik feto kontinua iha.

"Objetivu asina deklarasaun ne'e ita haree oinsá halo prevensaun ba violénsia hasoru feto no labarik, la'os atu halakon, maibé oinsá atu reduz," dehan nian iha Suku Ostiko, sesta (10/06).

Durante ne'e, GIZ liuhusi KDP kapasita ona joven promotor sira atu halo sosializasaun iha nível Aldeia to'o Munísipal, tanba hetan ona matéria kona-ba violénsia hasoru feto no labarik feto.

"Nu’udar joven, ha'u prontu aplika fali matéria iha komunidade nia leet, ita haree liu-liu iha Suku sira violénsia sei akontese," nia argumenta

Diretóra KDP, Olga Matilde da Costa, afirma, joven sira ne'ebé asina ona deklarasaun, sei sai promotor hodi kria enveromentu hakmatek iha Suku.

"Sira deklara ona katak, sei servisu iha Suku ida-idak hodi sensebiliza informasaun kona-ba lei violénsia doméstika no ajuda fó formasaun ba nia maluk sira," nia akresenta

Aktividade ne'e, hetan suporta husi Governu Alemaña implementa husi KDP, tanba haree ba violénsia hasoru feto no labarik feto númeru aas.

Promotor ne'e, joven na'in-100 kompostu husi feto 50 no mane 50, ne’ebé husi Suku Ostiko, Gurusa Munísipiu Baukau no Suku Suro, Ilalai Munisípiu Lautém.

Asesora Prisipal GIZ, Luisa Schorz, hatete, programa GIZ liuhusi Sekretáriu Estadu Juventude no Despostu (SEJD) implementa ona programa transforma juventude ba mudansa iha Timor-Leste.

"Atu muda ema nia hanoin la'os fasil, maibé ho sira nia komitmentu badinas ho espíritu sei lori foinsa'e sira ba hakribi violénsia haburas dame, dame mai husi ita nia aan mak sei da’et ba ema ne'ebé besik ita," nia argumenta

Enkuantu programa ne'e, GIZ implementa liuhusi organizasaun lokál sira iha Munísipiu Baukau, Lautém, Vikeke no Dili, atu forma foinsa'e sira ba kualidade forte halo mudansa liuhusi hakribi violénsia.

Sekretáriu Autoridade Munisípal Baucau, Simão dos Santos Marques Pinheiro, agradese ba servisu parseiru dezenvolvimentu sira iha Munísipiu Baukau, ne'ebé hakarak transforma komunidade ba situasaun próspero.

"Kada tinan iha duni violénsia ne'ebé akontese iha komunidade nia leet, Baukau ita iha 158.00 abitantes mai ho karakter, identidade oi-oin, entaun difísil atu ses husi violénsia," nia argumenta

Maibé, agradese ba entidade servisu, liu-liu Organizasaun Naun Governamental (ONG) lokál sira, liuhusi ajénsia internasionál durante ne'e, halo sosializasaun bele minimiza ona violénsia sira. (*)