Prezidente Autoridade Munísipiu (PAM) Baukau, Olivio Freitas, hatete, konvoka fali reuniaun iha nível Munísipal, atu esplika ba Diretór hodi bele hala’o nia kna’ar tuir Lei.
"Espera Diretór sira bele koñese didiak nia kna'ar atu hala'o servisu ho di'ak, tanba kompetensia ne'ebé lei atribui mai, dala barak Diretór sira balun seidauk intende didiak kompetensia, ida ne'e mak hakarak reuni atu esplika kompetensia prorias ne'ebé lei atribui," dehan nia iha salaun apuramentu Baukau, tersa (07/06).
Enkuantu Reuniaun konsellu koordenasaun teritórial foin lalais ne'e, partisipa husi Administradór sira iha teritóriu nasionál, Diretóres Jerais no Nasionais sira husi MAE, inklui doadores sira ne'ebé iha ligasaun ho Governu sentral.
Durante reuniaun konsellu koordenasaun teritórial ne'ebé realiza iha Munísipiu Kovalima, kada Autoridade Munísipiu halo aprezentasaun.
"Husi Munísipiu Baukau mak matéria Planu Asaun Anúal (PAA) ho orsamentu 2022," nia informa
Enkuantu Orsamentu Jerál Estadu (OJE) 2022 promulga ba Autoridade Munísipiu Baukau ne'ebé ho montante US$4,931,124.00 no husi orsamentu ne'e, Autoridade Munísipiu Baukau ezekuta ona pursentu 32. (*)
