Login to your account

Username *
Password *
Remember Me

KHUNTO ‘Ameasa’ Deputadu Fretilin Labele ‘Mete’ Disputa Rai iha Komoro

fe Bankada Kmanek Haburas Unidade Nasional Timor Oan (KHUNTO), Olinda Guterres. fe Bankada Kmanek Haburas Unidade Nasional Timor Oan (KHUNTO), Olinda Guterres. Foto Suplay

Tempotimor (Dili)-Xefe Bankada Kmanek Haburas Unidade Nasional Timor Oan (KHUNTO), Olinda Guterres, 'ameasa' Deputadu FRETILIN, Dario Madeira, atu labele mete hodi ko’alia kona-ba kazu disputa rai ne'ebé mak akontese iha área Aimeti Laran, Suku Komoro, Postu Administrativu Dom Aleixo, Munisípiu Dili, tanba la kompriende.

“Kona-ba rai ne'e kuaze loroloron ema ko'alia mak rai e parte ida ne'ebé mak manán tiha ona iha tribunál Dili depois parte ne'ebé mak lakon iha Tribunál Rekursu ba Rekursu kontinua ho juis na'in-tolu mak kaer ida ne'e to'o manán nafatin e to'o agora ne'e seidauk bele rezolve, e rai mak hanesan ohin señor Dario ko'alia ne'e. Señor Dario ko'alia ne'e la kompriende, lahatene rai ne'ebá se nian, kuandu lahatene labele ko'alia”, dehan Olinda iha Plenária Parlamentu Nasionál, tersa (07/06).

Iha deklarasaun Deputadu FRETILIN, Dario Madeira hatete, sira sempre levanta kona-ba disputa rai ne'e atu Governu liliu Sekretáriu Estadu Terras Propriedade atu haree didi’ak, tanba iha rai balun ne'ebé mak agora iha hela Komoro, área Aimeti Laran, pesoál balun okupa rai ne'e desde tinan naruk derepende ema ida mosu mai ho akuzasaun falsu dehan ema ne'e okupa rai ne’e iha 2009 ho ilegál.

Ho ida ne'e, nia mak manán tanba ema ne'e kbi’it laiha, no nia labele selu nia advogadu ne'ebé di'ak, enkuantu ema ne'ebé mak iha osan manán kazu iha tribunál ema ne'ebé laiha osan nia lakon iha tribunal, ida ne'e kestionavel.

Maibé ba kazu ne'e Xefe Bankada KHUNTO, Olinda Guterres konsidera deputadu Dario ladún hatene kona-ba disputa raí iha Komoro tanba rai ne'ebá Deputada Olinda mós sai testamuña no iha momentu ne'eba pesoál rai na'in sira mós fó ba nia hodi sosa no ba rejistu iha Ministériu Justisa.

“Nota mak ha’u entrega ba señor ministru, kala ita-boot ko'alia ida ne'e mais ita-boot sala, ita-boot lahatene sá tinan, sá oras, sá loron mak ema fó malu osan ba sosa rai ida ne’ebé, ita-boot lahatene, ne'ebé rai ida ne'ebé ita-boot lalika tama, di'ak liu lalika”, afirma nia.

Tanba bankada KHUNTO mós la fiar Tribunál Rekursu simu osan atu fó manán ba ema seluk ne'ebé iha kbi’it.

“Ha’u la fiar, ema na'in-tolu ne'ebé mak juiz koletivu tidak mungkin simu osan mak hodi fó manán ba rai ne'e, ne'ebé señor deputadu kuandu ko'alia haree didi’ak mak ko’alia”, deklara nia.

Nu’udar reprezentante povu iha uma fukun ida ne'e hakarak husu ba Tribunál Rekursu atu halo averuiguasaun no avaliasaun ka fikalozasaun ba orgaun soberania ne'ebé Prezidente Tribunal Rekursu mak lidera rasik presiza orienta ninia ema sira atu nune'e servisu ho responsabilidade.

“Tanba ida manán no lakon. Tribunal Rekursu fó sai manán mais iha okos servisu laloos e kuandu servisu laloos husu ba Tribunál Rekursu ezonera kuandu ezonera ema ida servisu laloos rai lá naben tasi lá sa'e”, hatete nia.

Ba kestaun ne'e, Deputadu Bankada FRETILIN, Dario Madeira husu Deputada Olinda tenke rona uluk deputadu sira seluk ko'alia molok kestiona.

“Buat ida tau tilun ne'e tau para ita rona mak ita hatan malu, la tau buat ne'e derepende ita sai tiha ita lansu ataka de’it ema seluk. Ha'u hatene dala barak deputadu e deputada sira halo buat ne'e maibé ba ha’u, ida ne'e ha’u haree hanesan la ho justu, ataka ida ne'e laiha lójika”, katak nia.

Tanba deklarasaun ne'ebé Deputadu Dario fó sai ne'e atu defende povu ki’ik nia diretu, no la’ós defende iha rai ida nia kotuk.

“Ha'u lá sosa rai iha Delta-Komoro afinal das kontas imi mak sosa rai entaun imi levanta iha Parlamentu para tribunál ho Governu afavor ba ita para imi manán ema ki’ik sira. Ha'u nunka iha kazu sira ne'e nia kotuk e ha'u ko'alia bazeia ba deklarasaun no reklamasaun sira ne'ebé povu ki’ik sira aprezenta mai barak iha ami-nia komisaun”, hatete nia.

Ba disputa rai ne'e mós la temi deputadu ida nia naran, maibé temi jerál de'it tanba keixa ne'ebé mak komisaun A simu maioria ne'e keixa husi ema ki’ik ne'ebé laiha kbi’it atu hasoru ema boot.

“Imi sira ne'ebé sosa rai, imi iha laran duni tanba ne'e mak imi levanta ha'u ida ne'ebé levanta dadauk kazu ida ne’e ha'u onestu ha'u defende povu ki’ik nia diretu, justisa tenke la'o, Timor tomak agora ema kestiona ita-nia justisa, ida ne'e mós hanesan ha'u-nia apelu ida ba Ministériu Justisa no ba Tribunál tesi lia ne'e tenke haree ho didi'ak para povu ki’ik ne'e labele halerik bebeik ba justisa”, deklara nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« August 2022 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Tempo Timor Networks

Online Counter