"Ha'u espera ita boot (joven) sira bele prepara aan, tanba ita boot sira mak kuluna bertebral, prepara aan bele simu poder ne'ebé mosu mai," dehan nia iha salaun apuramentu Baukau, tersa (07/06).

Tanba, lei poder lokál aprova ona husi Prezidente Repúblika (PR) anterior Francisco Guterres Lú-Olo, fó poder ba Prezidente Autoridade, maibé liuhusi avalisaun ne'ebé Governu sentral haruka ba Munísipiu hotu.

Wainhira lei poder lokál implementa, Prezidente Autoridade sei lanomea direita, maibé sei liuhusi eleisaun mak determina.

Diretór Jerál Dezentralizasaun Administrativa Belarmino Filomeno Neves, hatete, dezentralizasaun mandatu konstituisionál ne'ebé hatur ona iha Konstituisaun Repúblika artigu 137 kona-ba prinsipiu jerál administrasaun públika.

Nune'e, atu manifesta real konteudu husi mandatu konstituisionál, Governu hahú prepara ona polítika ba dezentralizasaun adminstrasaun iha tinan-2016 ho kriasaun dekretu lei nú.03, ne'ebé altera dala tolu, maibé iha ne'eba hala'o ona polítika dezentralizasaun ba faze tolu.

Faze dahuluk, deskonsentrasaun administrativa teritórial, ne’ebé kompetensia servisu fó ba Munísipiu sira, maibé responsabilidade nafatin iha nasionál. Daruak, sei tama ba faze dezentralizasaun adminstrasaun administrativa institusionál no datoluk prinsipiu dezentralizasaun administrativa territórial, ne'ebé kumpre mandatu konstituisionál hatur ona iha artigu 72 Konstituisaun Repúblika atu kria poder lokál.

"Polítika Governu liuhusi Ministru Administrasaun Estátal hakarak ka lakohi tinan oin Munísipiu hotu-hotu transforma hotu ona ba administrasaun indireita do estadu," nia informa. (*)