Print this page

PR Horta Konkorda Sai Oradór Prinsiál iha Reuniaun TLDPM

Ministru Finansas, Rui Gomes (klaran), Vise-Ministru Finansas, António Freitas (los) no reprezentante husi Gabinete Primeiru-Ministru, Azevedo Lourenço da Costa Marçal, iha Palásiu Prezidente Aitarak Laran. Ministru Finansas, Rui Gomes (klaran), Vise-Ministru Finansas, António Freitas (los) no reprezentante husi Gabinete Primeiru-Ministru, Azevedo Lourenço da Costa Marçal, iha Palásiu Prezidente Aitarak Laran. Foto Suplay

Tempotimor (Dili)-Prezidente Repúblika, José Ramos-Horta konkorda sai Oradór Prinsipál iha Reuniaun Anuál entre Governu no Parseirus Dezenvolvimentu (TLDPM) ne’ebé sei realiza iha sesta (10/06) iha salaun Ministériu Finansas.

“Purtantu ida ne'e mak ami informa ba sua eselénsia nomós sua eselénsia mós aseita atu ba fó mensajen ida iha ne'ebá ko'alia kona-ba perspetiva Prezidénsia da repúblika nian ba desenvolvimentu Timor-Leste nian iha aban bainrua, purtantu ida ne'e mak ita espera sei akontese iha sesta feira”, dehan Ministru Finansa (MF), Rui Augosto Gomes hafoin audénsia ho PR Horta iha Palásiu Prezidensiál, tersa (07/06).

Ba desizaun ne’e Xefe Estadu konfirma iha reuniaun ho Ministru Finansas, Rui Gomes hamutuk ho Vise-Ministru Finansas, António Freitas no reprezentante husi Gabinete Primeiru-Ministru, Azevedo Lourenço da Costa Marçal, iha Palásiu Prezidente Aitarak Laran.

Iha forum altu nível ne’e, Prezidente Repúblika, José Ramos-Horta sei fahe nia vizaun Prezidensiál kona-ba dezenvolvimentu nasionál Timor-Leste no oinsá Oitavu Governu Konstitusionál no Parseiru Dezenvolvimentu bele serbisu hamutuk hodi fó apoiu alkanse objetivu sira ne’e.

Reuniaun anuál ho Parseirus Dezenvolvimentu ne’e sei prezide husi Ministru Rui Gomes no ko-prezide husi Ministra Adalgiza Magno ho tema “Hamutuk, Ita Servisu hodi Rekupera Ekonomia ba Sosiedade ida ne’ebé Reziliente”. Tanba ne’e nia objetivu mak atu permite Governu atualiza ba Parseiru Dezenvolvimentu, kestaun sira ne’ebé mak bele afeita ba Timor-Leste nia dezenvolvimentu nasionál.

Tópiku diskusaun prinsipál ne’ebé Governu no Parseiru Dezenvolvimentu sei diskute iha fórum altu nível ne’e mak Reforma Jestaun Finansas Públikas ne’ebé mak Governu anteriór inisia ona desde tinan 2015, Adaptasaun Klimátika no Avaliasaun Nutrisaun.

Reuniaun TLDPM tinan ida-ne’e diferente tamba akontese iha ámbitu Komemorasaun Vigésimo Aniversario Restaurasaun Independénsia Timor-Leste no toma pose ba Prezidente Repúblika foun ba mandatu 2022 to’o 2027. Reuniaun TLDPM ne’e mós marka inísiu Faze Preparasaun OJE 2023 molok Governu hakat ba Jornada Orsamentál ne’ebé sei realiza iha loron 30 fulan-juñu 2022.

Reuniaun TLDPM ne’e sei hetan partisipasaun husi Orgaun Soberanu, Membrus Oitavu Governu Konstitusionál, Korpu Diplomátiku, Parseirus Dezenvolvimentu, Organizasaun Sosiedade Sivíl, Reprezentante sira husi Konfisaun Relijiozu, Akadémiku, Setór Privadu inklui Mídia.

“Iha ne'ebá mós ita sei iha aprezentasaun lubuk ida, ida mak ita sei lansa roteiru kona-ba ita-nia Polítika Finansa Públika nian, ida fali mak doutor Aze Vedo rasik sei ko'alia kona-ba ita nia kadeia de valór, produtu sira ne'ebé ita halo iha Timor to'o iha konsumidór sira, ida ne'e mós aspetu ida ita sei ko'alia”, esplika nia.

Iha enkontru ne'e mós ko’alia kona-ba adaptasaun klimátika ida ne'e husi Sekretáriu Estadu Ambiente nian no ikus liu ko'alia kona-ba aspetu nutrisaun ka des-nutrisaun liliu ba labarik no inan sira tanba ida ne'e aspetu ida ne'ebé mak afeta tebtebes iha Timor alastra to'o sosiedade, no ida ne'e doutora Odete Viegas mak sei aprezenta materia ida ne'e.

Ba reuniaun bilaterál iha tinan 2022 ne'e, Prezidente Republika sei fó mensajen foka liuba aspetu nutrisaun Labarik sira nomós inan sira ne'ebé mak iha raí laran.

“Parseiru sira ne'e ita-nian, balun iha rai laran no balun iha non-rejidente sira ne'ebé karik iha Singapura, iha Jakarta balun sei akompaña vídeo konferénsia e balun sei mai, purtantu parseiru sira mak ita-nia embaisadór sira ne'ebé iha raí laran nomós ita-nia multilaterál sira hanesan banku mundiál ADB, JICA, ho sira ne'ebé tulun Timor-Leste”, afirma nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items