“Ha'u atu halo loos tiha kestaun ida Eletrisidade, ha'u nuudar kelikai oan ha'u hatene sé mak dada Eletrisidade iha Kelikai ne'e ha'u hatene. Eletrisidade ne'ebé mak dada iha Tabere ne'e estadu mak dada iha 2019, laiha komunidade ida mak dada eletrisidade direita satan nia la kompriende eletrisidade”, dehan nia iha plenária Parlamentu Nasionál, segunda (06/06).
Tanba deklarasaun ne'ebé mak Deputada husi Bankada CNRT fó sai iha loron 26 fulan-abril 2022, dehan komunidade husi Aldeia Tabere Suku Letemumo, Postu Administrativu Kelikai, Munisípiu Baukau, sosa mesak fiu dada ahi eletrisidade ho au, ikus Governu ba monta prepagu de'it.
Ho deklarasaun ne'e Bankada PLP konsidera ne'e hanesan politizasaun ida tanba imajinasaun dehan populasaun ba sa'e iha riin Eletrisidade hodi dada rasik ahi ba nia uma ne'e seidauk akontese iha Postu Kelikai.
“Se deputadu ohin ne'ebé mak levanta kestaun ne'e ita-boot sira bele sa'e took ba eletrisidade ne'e ha'u bele fiar ida ne'e, lójika ne'e iha ne'ebé”, hatete nia.
Tanba ne'e laloos bainhira komunidade mak dada rasik eletrisidade depois ekipa Eletrisidade Timor-Leste (EDTL) ba monta fali prepagu ne'e laloos.
“Ne'e mak bolu naran politiza aktu Governu, loloos mak ahi ne'e Estadu e Governu mak dada. E eletrisidade sira tau ba prepagu ne'e sira utiliza ona durante tinan tolu ho gratuitamente ne'e ita ajuda ona komunidade eh Governu iha razaun atu monta prepagu”, afirma nia.
Maibé Deputada Veneranda Lemos hatete informasaun ne'ebé mak nia fó sai iha plenária ne'e la’ós inventa maibé ne'e mai direta husi autoridade lokál sira tanba ne'e nia sei defende kestaun ida ne'e.
“Ha'u dala ida tan atu hatete kona-ba eletrisidade ha'u ko'alia nafatin tanba informasaun mai husi Xefe Suku rasik ne'ebé se ita ne'eba nia oan duni, ita-boot nele defende, ha'u mós defende nafatin tanba ne'e mai husi autoridade lokál, ha'u mós la inventa”, hatete nia. (*)