Print this page

Taur Kongratula Anthony Albanese Sai PM Austrália

Primeiru Ministru (PM), Taur Matan Ruak (karuk), Primeiru Ministru Austrália, Anthony Norman Albanese. Primeiru Ministru (PM), Taur Matan Ruak (karuk), Primeiru Ministru Austrália, Anthony Norman Albanese. Foto Suplay

Tempotimor (Dili)-Primeiru Ministru (PM), Taur Matan Ruak, lori povu Timor-Leste nia naran saúda no kongratula onorável ba deputadu Anthony Albanese ne'ebé sai Primeiru-Ministru foun Austrália.

Saudasoen no kongratula onorável ne'e PM Taur hato'o liuhusi konversa telefónika ba dahuluk ho nia omólogu foun Australianu, Anthony Norman Albanese.

“Lori povu Timor-Leste nia naran ho naran rasik, saúda no kongratula Onorável ba Deputadu Anthony Albanese ba kargu Primeiru-Ministru no iha ambitu konversa nee, reafirma mós kompromisu Governu Timor-Leste nian kontinua hametin no hakle’an relasaun no kooperasaun bilateral entre Dili no Canberra tantu iha nível povu ba povu no Estadu ba Estadu”, dehan PM Taur iha Komunikandu Imprensa ne'ebé www.twmpotimor.com asesu iha segunda (06/06).

Aleinde ne'e husi parte rua fó hanoin ba malu kona-ba hametin no hakle’an País rua nia relasaun no kooperasaun bilaterál ne’ebé estabelesidu ona iha tinan 20 ikus ne’e.

Aproveita biban refere, Xefe Ezekutivu Timoroan agradese ba apoiu Australianu nian durante ne’e iha área hotu no espesiálmente iha área krusiál no importante hanesan projetu Fibra Ótika no espansaun Aeroportu Internasionál Prezidente Nicolau Lobato.

Tanba konsidera Austrália hanesan parseiru no belun di’ak Timor-Leste nian ne’ebé hamriik iha povu Timor-Leste nia sorin dezde funu mundiál daruak, 1999, 2006, 2020-2021 iha tempu Pandemia COVID-19 no dezastre naturál.

Primeiru-Ministru Austrália, Anthony Albanese, agradese tebes ba nia omólogu Timoroan ba votu saudasoens no parabéns, hodi reafirma mós kompromisu Governu foun Austrália nian atu kontinua serbisu hamutuk ho Governu Timor-Leste atual hodi fó apoiu ba área sira hanesan mudansa klimátika nian, mobilidade laborál, seguransa rejionál, Governu Eletrónika no dezenvolvimentu ekonómiku país ne’e nian.

Molok termina konversa, Primeiru-Ministru Albanese nian mós konvida Xefe Governu Timor-Leste atu halo vizita, ne’ebé sei halo antes mandatu termina.

Tanba tuir loloos hala’o ona vizita iha fulan-fevereiru tinan 2022, maibé tanba pozitivu ho COVID-19, vizita refere tenke adi’a fali.

Ba resposta pozitivu ne’e, Xefe Governu Australianu hein ho laran kontente nia omólogu Timoroan iha Austrália. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items