“Semana-semana ha’u mai ko’alia iha ne’e sempre frontline, ha'u informa hotu ba parte konpetente atubele rezolve problema sira ne'e, tanba ne'e, ha'u sujere se bele karik di'ak liu atubele lalais liu, konvida de'it mimistru kompetente ou vise mimistru mai iha ne'e atu halo esplikasaun loloos kona-ba parte husi PNTL ninian enrelasaun ho Frontline”, dehan nia iha Plenária PN, segunda (06/06).

Tanba ko’alia kona-ba kestaun liña frente ne'e, benifisiáriu balun simu de'it pagamentu fulan-rua no balun simu fulan-neen, maibé atu esplika kestaun ida ne'e presiza husu direta ba ministru kompetente.

“Depende ba saída mak sira iha ne'eba atu nune'e Parlamentu ne'e bele hetan esklaresimentu loloos sobre kestaun ne'ebé mak agora enfrenta dadauk”, afirma nia.

Iha ne'e, MAPKomS rasik kada semana fila husi reuniaun plenária sempre halo karta ba membru Governu sira depende ba preokupasaun husi deputadu sira ne'e atubele fó resposta, maibé tanba Membru Governu balun to'o agora la fó resposta ruma ba MAPKomS atubele aprezenta ba PN.

Tanba ne'e, PN iha dalan seluk atubele bolu ministru sira mai iha PN halo esklaresimentu di'ak liu no diskute di’ak liután ho ministru sira hodi bele haree solusaun di’akliu kona-ba problema frontline nomós en-relasaun ho restu mortais sira ne'ebé to’o agora seidauk haloot.

“Atu nune'e ita bele iha ideia ida ita bele iha konseitu ida loloos atu nune'e bele fó solusaun ba problema ne'ebé mak ita hasoru dadaun ne'e”, esplika nia. (*)