Print this page

Xina ho Timor-Leste Kontinua Hametin Relasaun Bilatera

Primeiru Ministru (PM), Taur Matan Ruak ho Ministru Negósius Estranjeiru Repúblika Popular Xina, Wang Yi, simbolikamente loke plaka komemorativu tinan 20 estabelesimentu relasaun diplomátika entre Timor-Leste no Xina. Primeiru Ministru (PM), Taur Matan Ruak ho Ministru Negósius Estranjeiru Repúblika Popular Xina, Wang Yi, simbolikamente loke plaka komemorativu tinan 20 estabelesimentu relasaun diplomátika entre Timor-Leste no Xina. Foto Suplay

Tempotimor (Dili)-Primeiru Ministru (PM), Taur Matan Ruak, hetan vizita ofisiál husi Konselleiru Estadu no Ministru Negósiu Estranjeiru Repúblika Popular Xina, Wang Yi, hodi hametin liután relasaun bilaterál nasaun rua nian, iha últimu tinan 20 ne’e.

Enkontru ne’ebé nakonu ho amizade ne’e, Xefe Governu Timor-Leste, agradese tebes ba Governu Xinéza nian ba apoiu hothotu durante tinan 20 nia laran.

Agradese espesiál mós ba apoiu medikamentu no ekipamentu protesaun nian iha mitigasaun no prevensaun COVID-19 nian durante períodu pandemia.

“Parte rua konkorda katak sei hametin liután lasu amizade ne’ebé la’o ona durante ne’e hodi respeita nafatin prinsípiu sira Estadu ida-idak nian”, dehan PM Taur, bainhira hetan vizita husi Konselleiru Estadu no MNEK Xina, Wang Yi, iha Palásiu Governu, sesta (03/06).

Xefe Governu Timor-Leste no MNEK, Wang Yi, loke simbolikamente plaka komemorativu tinan 20 estabelesimentu relasaun diplomátika entre Timor-Leste no Xina.

Durante Estadia oras 24 iha Dili, Ministru Negósiu Estranjeiru, Wang Yi sei hala’o enkontru bilaterál ho nia ómologa Timorense, Adaljiza Magno hodi fó sasin ba asinatura akordu entre Governu Repúblika Demokrátika Timor-Leste no Governu Repúblika Populár Xina iha área sira hanesan Kooperasaun Ekonómika no Téknika, Área Saúde, Administrasaun Rádiu no Televizaun Nasionál (RTTL) no akordu kontinuasaun prosesu dijitalizasaun RTTL no projeitu televizaun dijitál terrestre.

Akompaña Xefe Governu Timorense iha enkontru ne’e mak hanesan, Ministra Negósiu Estranjeiru no Kooperasaun, Adaljiza Magno, Ministru Prezidénsia Konsellu Ministru, Fidélis Lei Magalhães, Embaisadór Timor-Leste ba Xina, Abrão dos Santos, Diretór Jerál Asuntu Bilaterál, Domingos Savio, Xefe Gabinete Primeiru-Ministru, Azevedo Lourenço da Costa Marçal.

Enkuantu akompaña Ministru Negósiu Estranjeiru, Wang Yi, mak hanesan, Embaisadór Xina iha Dili, Xiao Jiangou, Vise-Ministru Negósius Estranjeiru, Xie Feng, Ministru Adjuntu, Ministériu Komérsiu, Guo Tingting, Vise-Diretór Ajénsia Kooperasaun Internasionál ba Dezenvolvimentu Xina, Zhao Fengtao, Sekretáriu Konselleiru Estadu no Ministru Negósius Estranjeirus nian, He Wei, Vise-Diretór Jerál  Departamentu  ba Asuntu Norte Amerikanu no Oseánia-MNE, Yao Wen, no Vise-Diretór Jerál Departamentu Informasaun MNE, Jiang Xiaoyan. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items