“Enkontru furak tebes ho prezidente Repúblika, ami ko'alia asuntu oioin, liliu kona-ba asuntu apoiu Estadu Unidu Amerika nian ba dezenvolvemenu politika ekonomia iha rai laran”, dehan Tom Daley hafoin audénsia ho PR Horta iha Palásiu Prezidensiál Bairopite, sesta (03/06).

Durante audénsia, diskute mós kooperasaun atuál ne'ebé EUA ho Timor-Leste agora no ba futuru, tanba EUA sei prontu nafatin atu servisu hamutuk ho Governu no Prezidénsia Repúblika.

“Kooperasaun iha nível oioin, ami ohin iha ne’e Diretora misaun nian Sr Zema Semunegus ne'ebé karik nia mós sei ko’alia ba imi kona-ba USAID nia apoiu”, hatete nia.

Iha ne'e EUA mós hakarak fó sai katak, tempu besik EUA sei asina akordu Millennium Challenge Corporation (MCC) ho Governu Timor-Leste.

Tanba Programa MCC ne'e nu’udar programa kompaktu ida ne’ebé sei foka liu ba área rua hanesan Bee no saneamentu no ida seluk kona-ba setór edukasaun. Nune’e EUA sei sei oferese tan orsamentu hamutuk millaun $420 ba Timorr-Leste.

“Ha'u mós hakara fó sai ba ita-boot sira aleinde Timor-Leste komemora ninia restaurasaun indenpendénsia ba tinan 20, ami mós komemora tinan 20, kooperasaun bilaterál ka relasaun bilaterál entre Timor-Leste ho Estados Unidos, e ami-nia kooperasaun durante ne’e bazeia ba pilar tolu, ida mak belun, parseiru no oportunidade, Zema Semanegus”, esplika nia. (*)