Diretór DTP Baukau, Raimundo de Jesus, hatete, DTP kontinua servisu hamutuk ho Autoridade sira iha Munísipiu Baukau, hodi halo atribuisaun rai ba entidade servisu sira iha Baukau.
Tanba ne'e, iha loron 02 fulan-juñu tinan-2022 (ohin) Diresaun Teras Proriedade Baukau, halo levantamentu ba rai komunal iha Suku Triloka hodi atribui ba Diresaun Nasionál Turizmu nian.
"Ba Turizmu hektar ida, iha Suku Triloka parte Instituisaun Jestaun Ékipamentus (IJE) nia sorin," dehan nia iha kna'ar fatin vila nova, kinta (02/06).
Xefe Suku Triloka, Alexandre da Costa, hatete, parte Suku Triloka prontu kopera ho estadu halo dezenvolvimentu liuhusi harii edifísiu.
"Rai ne'e área Aubaka nian, maibé rai ne'e uluk mamuk ita la uza mak ita nia maluk balun mai kuda ai-horis iha ne'e, maibé ai mate hotu ona, entaun rai ne'e mamuk hela, mais sei iha problema, tanba iha ne'ebé de'it sukat rai ne'e sei iha problema mosu, maibé ita tuur hamutuk mak buka nia solusaun," nia hatete.
Entretantu iha loron 8 fulan-marsu tinan-2022, DTP hamutuk ho Prezidente Autoridade Munísipiu Baukau, atribui uluk, rai hektar-2 ba Polísia Imigrasaun atu harii edifísiu.
"Polísia Imigrasaun nia fatin ne'e, kona-ba oinsá haree ba Aeroportu, ne'e mak sira tau iha ne'e," nia hatete. (*)