“Ida ne’e nu’udar orgullu ida ba sarani sira iha Timor-Leste, tanba Arsebispo Metropolitano Dili nu’udar mós kandidatu ida husi Kardeál na’in-21 ne’ebé mak anunsia husi Amu Papa Francisco”, dehan Horta liuhusi Komunikadu Imprensa ne'ebé www.tempotimor.com asesu, segunda (30/05).
Tanba iha loron Domingo Asensaun 29 Maiu 2022 liuhusi orasaun Maria do Regina Coeli, Amu Papa Francisco anunsiu konvokatória ida iha 27 Agostu ba kriasaun Kardeál foun.
Ho ida ne'e Prezidente Repúblika fiar katak pronunsiamentu ba kargu foun ne'ebé fó sai husi Amu Papa ida ne’e la'ós de'it lori previlejiu ba Arsebispo Metropolitano Dili Eminensia Dom Virgilio do Carmo da Silva, maibé mós nu’udar onra boot ida ba igreja katólika iha Timor-Leste.
“Ida ne’e nu’udar etapa istóriku ne’ebé mak simu husi komunidade katóliku tomak iha Timor-Leste ne’ebé dominante husi 98 persentu”, afirma nia.
Ba desizaun ne'e, Horta lori povu no nasaun nia laran hato’o sentimentu haksolok no orgulhu ba dezisaun sua Santidade Papa Francisco. (*)