“Ha’u mai breafing Primeiru-Ministru no relata progresu preparasaun vizita Ministru Negósiu Estranjeiru Xina, ne’ebé sei mai vizita Timor-Leste. Ha’u relata ba Primeiru-Ministru akordu saida mak ita atu asina tanba Primeiru-Ministru tenki hatene uluk molok simu ministru ne’e”, dehan Ministra Adaljiza Albertina, hafoin sorumutu ho Primeiru Ministru (PM), Taur Matan Ruak, iha Rezidénsia Ofisiál PM, Farol, segunda (30/05).
Akordu ne'ebé Timor-Leste hakarak asina ho Governu Xina mak hanesan, akordu servisu aero Air Service Agreement(ASA), akordu apoia Rádiu Televizaun Timor-Leste, Empreza Públika (RTTL,E.P), akordu kona-ba apoia médiku espesialista mai Timor-Letse, akordu ekonómiku, ba área agrikultura no bee-moos inklui akordu balun ne’ebé sei diskute hela no kuandu iha ona konkordansia sei anunsia.
Durante vizitasaun husi Ministru Negósiu Estranjeiru Xina ne’e, iha loron ida de'it (24 oras), ne’ebé sei aproveita mós hasoru Prezidente Repúblika (PR), José Ramos Horta, Ministra Negósiu Estranjeiru no Kooperasaun, Adaljiza Albertina Xavier Reis Magno, inklui Primeiru-Ministru, no entidade sira seluk tan. (*)