Print this page

FRETILIN Preokupa Xanana Akompaña Toma Pose PR Husi Liur

Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, ne’ebé tuir hela iha karreta leten akompaña serimónia toma pose prezidente repúblika iha Tasitolu. Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, ne’ebé tuir hela iha karreta leten akompaña serimónia toma pose prezidente repúblika iha Tasitolu. Foto Suplay

Tempotimor (Dili)-Deputadu Bankada Frente Revolusionáriu Timor-Leste no Independente (FRETILIN), Dario Madeira, preokupa ho prezensa Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, ne’ebé mak hamriik iha liur hodi akompaña serimónia tomada pose Prezidente Republika (PR), José Ramos Horta, iha Tasitolu.

“Atu ko'alia iha ne'e, ita-nia serimónia tomada pose ba Prezidente Repúblika foun ita la'o tiha ona, maibé públiku nafatin preokupa, e ha'u rasik mós preokupa ba asuntu ida ne'e. Líder Rezisténsia, líder nasionál hanesan señor Kay Rala Xanana Gusmão, sira fó konvite ka la'e, ne'e públiku kestiona e ida ne'e mídia sosiál mós rame loos ida ne'e, líder nasionál ida hanesan ne'e sira fó konvite ka la'e, mak momentu kuandu serimónia la'o nia ba de'it iha serimónia nia ninin iha de’it liur”, hatete nia iha plenária PN, tersa (24/05).

Tanba ne’e husu ba komisaun organizadora ba tomada pose Prezidente Repúblika nian tenke esplika ida ne’e ba públiku tomak, atubele esklaresidu no kompriende.

"Ne'e komunidade preokupa e ha'u rasik husu duni ba prezidente komisaun organizadora ne’ebé tama konta ba serimónia ida ne'e tenke esklarese ba públiku para públiku bele hatene”, afirma nia.

Bainhira komisaun organizadora la fó konvite ne'e sala boot no presiza investiga sira, hodi hatene sira-nia intensaun saida mak la konvida líder Kay Rala Xanana Gusmão hodi partisipa iha serimónia tomada pose.

FRETILIN ko'alia tanba líder boot hanesan Xanana Gusmão kuandu estadu la konvida nia depois ba akompaña husi liur ne'e FRETILIN hanoin katak ne'e halo moe ba estadu, no halo moe veteranu sira-nia oin.

"Tanba ne'e ha'u husu komisaun organizadora tenke esplika tenke simu responsabilidade ida ne'e”, esplika nia.

Ba kestaun ne'e, Ministru Asuntu Parlamentar no Komunikasaun Sosiál (MAPKomS) interinu, Juvinal Mericio Akara hatete, kona-ba konvite selebrasaun 20 maiu no toma pose ne'e Komisaun organziadora fó hotu maibé atu ba ne'e depende ba ida-idak nia desizaun.

Tanba ne'e, preokupasaun kona-ba komisaun fó konvite ba Xanana ho eis Primeiru Ministru Estanislau ka la'e, ida ne'e tuir informasaun ne’ebé simu husi vise ministru estatal ho komisaun organizadora informa katak konvite ne'e fahe ba líder sira hotu mais nee depende ba idaidak nian atu deside ba ka la ba.

"Pois hakarak dehan ba ita-boot sira, konvite ba sira hotu kedas, inklui maun Boot xanana, mós Komisaun Organizadora lori konvite ba0, hatete nia.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items