“Sei loke jardin prezidensiál pertense ba labarik iha Palásiu Prezidensiál Nicolau Lobato, Bairrupite ida ne'e, inklui tau Internet iha Jardim refere atu joven sira bele asesu, tanba Jardin iha luan hanesan ne'e ha'u labele mesak iha ne'e”, dehan Horta iha nia diskursu, iha Palásiu Prezidensiál Nicolau Lobato, Bairopite, sesta (20/05).
Prezidente Repúblika períodu 2022-2027, José Ramos Horta, sei promove igualidade jéneru pursentu limanolu (50%) entre feto no mane iha palásiu prezidensiál, kria departamentu ba sosiedade sivíl kona-ba defisiénsia, komunidade Lesbian Gays Bisexuals Intersexual (LGBTI) haree sira hanesan no kontinua programa sosiál ne’ebé prezidensiál halo ona.
Aleinde ne'e mós, nia konpromete, durante mandatu sei buka diálogu lidér nasionál hotu, Parlamentu Nasionál, sosiedade sivíl, akadémiku no oinsá hametin parseiru ho igreja hodi lori dezenvolvimentu nasaun ba oin, oinsá haree prioridade sira seluk hanesan edukasaun, saúde agrikultura, serguransa alimentár, kombate malnutrisaun, tranzisaun jerasionál, haree dezenvolvimentu husi Oekussi to’o ba Covalima.
Entretantu remata isár bandeira ba komemorasaun loron restaurasaun ba dala-XX, Prezidente Repúblika períodu 2022-2027, José Ramos Horta, konvida labarik sira-ne’ebé akompaña serimónia ne’e kumprimenta Prezidente Repúblika Portugál, Marcelo Rebelo de Sousa.
“Ha’u konvida labarik ki’ik sira iha ne’e atu mai iha oin hodi fó kumprimenta ba Prezidente Repúblika Portugál, Marcelo Rebelo, no Governadór Jerál Austrália”, dehan nia.
Nune'e labarik lubun ne’ebé ho idade 13 mai kraik la’o ho forma hakat kedas ba fatin Verry Important Person (VIP) nian ho oin hamnasa no ksolok, hodi kumprimenta direta Prezidente Repúblika, José Ramos Horta, Prezidente Portugál no Governadór-Jerál Austrália. (*)