FRETILIN realiza serimónia hodi simu hikas líder FRETILIN na’in-rua ne’e no entrega sertifikadu rekoiñesimentu no kartaun membru ba Tenente Jenerál Reformadu Lere Anan Timur iha CC, Komoro.

“Ha’u kontente tanba ohin bele simu filafali Kamarada Lú Olo. Kontente liután tanba bele simu filafali Kamarada Lere Anan Timur iha uma lulik ida ne’e, uma lulik ne’ebé reprezenta, rán ho ruin, isin sira ne’ebé mak naklekar iha Timor laran tomak”, dehan Sekretáriu Jerál FRETILIN, Mari Alkatiri iha CCF, Komoro, sesta (20/05).

Tanba ne’e mak FRETILIN nia hakarak duni, mean ho modok ho kór oinoin hamrik hamutuk no tuir loloos rekoñesimentu ba Lere Anan Timur halo tiha ona iha tinan-2015, maibé la konsege tanba Lere sei asume hela kargu hanesan Jenerál iha instituisaun F-FDTL.

“Biar hanesan Jenerál, Kamarada Lere Anan Timur nunka nega katak nia FRETILIN. Tanba ne’e nia mai iha ninia uma rasik. Lolos rekoñesimentu ida ne’e halo ona iha tinan-2015, maibé tanba nia sei jenerál, ami rai tiha dokumentu sira ne’e”, esplika nia.

Maibé FRETILIN fiar katak husi ne’e ba oin FRETILIN sei hetan kontribuisaun importante ba hametin liután FRETILIN, kontribuisaun nia naran mak Lere Anan Timur.

Prezidente Partidu FRETILIN, Francisco Guterres ‘Lú Olo’ hatete, iha tinan hirak liuba nia sai husi uma FRETILIN tanba atu ba kumpri misaun boot ida Prezidente Repúblika.

“Ohin, ha’u filafali mai uma lulik ida ne’e. Ha'u mai fali, ita hotu hamutuk atu hametin liután FRETILIN”, dehan nia.

Tanba ne'e, Lú Olo mós fó agradese ba apoiu hotu ne’ebé mak fó husi FRETILIN nia lideransa, militante no simpatizante sira, no povu tomak fó ba nia durante ninia mandatu hanesan Prezidente Repúblika.

Hafoin simu tiha Sertifikadu rekoñesimentu no kartaun membru nian, membru CCF Segunda Jerasaun Lere Anan Timur konsedere, loron ida ne'e hanesan onra boot ida tanba bele filafali mai hamutuk iha CCF.

“Ho honra boot tebes, ha’u bele filafali mai hamutuk ho kamarada sira hotu, halibur hamutuk iha uma lulik ida ne’e, sede Komité Sentrál FRETILIN. Uma lulik ida ne’e la’ós foun, husi vila muda ba foho, husi foho muda fali mai vila, tanba FRETILIN la kotu, nungka kotu, nungka lakon iha dalan klaran biar iha situasaun difísil nia laran”, afirma nia.

Iha serimónia ne'e, Partidu FRETILIN selebera mós aniversáriu fundasaun ASDT/FRETILIN ba dala 46. (*)