Print this page

Horta Orgullu Komemora Loron Restaurasaun Independénsia

Prezidente Repúblika, José Ramos Horta. Prezidente Repúblika, José Ramos Horta. Foto Suplay

Tempotimor (Dili)-Prezidente Repúblika, José Ramos Horta, orgullu nu'udar Timoroan bele komemora loron restaurasaun independénsia Timor-Leste ba dala-XX.

“Sente orgullu ita timoroan ohin selebra loron restaurasaun independénsia. Ha’u hakruuk ba éroi sira-ne’ebé mate ona hanesan Nicolau Lobato, Francisco Xavier Amaral ho sira seluk no sira -ne’ebé moris hanesan Xanana Gusmão, Taur Matan Ruak no Francisco Guterres Lú Olo,” dehan Horta iha nia diskursu, iha Palásiu Prezidensiál Nicolau Lobato, Bairrupite, sesta (20/05).

Prezidente Repúblika agradese tanba iha tempu luta sempre hamutuk ho apoiu soliedariedade internasionál to’o hari’i independénsia hodi konstrui estadu ho apoiu sistema Nasaun Unida nian.

Relasaun tenke dinámiku tanba Timor-Leste sei hametin liután relasaun diplomátika ho nasaun viziñu, relasaun bilaterál, multilarál iha mundu.

“Ita-nia polítika ba oin kontinua diplomásia orienta ita buka amigu, laiha inimigu. Ita fó prioridade ba nasaun vizíñu Indonésia, Austrália, Nova Zelándia no fó importánsia ba relasaun internasionál iha rejiaun ASEAN, Uniaun Europeia no hametin relasaun bilaterál ho rai sira iha ASEAN no hametin relasaun ho Korea Súl no Japaun. Ita sei halo relasaun ho Nasaun Unida iha área oioin ho mós haree programa Millenium Challenge Corporation (MCC) ne’ebé Nasaun Unidu apoia”, hatete nia.

Tanba ne'e, xefe Estadu, lori Estadu nia naran agradese ba prezensa Prezidente Portugál, Primeiru-Ministru Guine Bissau, konvidadu enviadu espesiál, reprezentante nasaun sira iha mundu, embaixadór sira, órganizasaun multilaterál no sira seluk ne’ebé iha komemorasaun 20 maiu no serimónia investidura Prezidente Repúblika nian.

Iha parte seluk, agradese partisipasaun partidu polítiku hotu iha prosesu demokrásia hahú iha 2002 to’o daudaun ne’e. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items