Login to your account

Username *
Password *
Remember Me

PR Lú Olo Hakarak Kombatente Sai Modelu ba Família no Jerasaun Foun

Prezidente Repúblika (PR), Francisco Guterres ‘Lú Olo’ entrega hela medala kondekorasaun ba familia martire sira iha Palasiu Prezidensial. Prezidente Repúblika (PR), Francisco Guterres ‘Lú Olo’ entrega hela medala kondekorasaun ba familia martire sira iha Palasiu Prezidensial. Foto Suplay

Tempotimor (Dili)-Prezidente Repúblika (PR), Francisco Guterres ‘Lú Olo’, hakarak kombatente no sidadaun sira sai modelu ida ne'ebé di'ak ba família uma laran inklui jerasaun foun sira.

“Husi soren seluk, nu’udar sidadã no sidadaun Timor-Leste, kombatente ida-idak, iha dever atu sai modelu di’ak ba família uma laran no mós ba jerasaun foinsa’e sira”, deklara Lú Olo, iha serimónia kondekorasaun ba sobrevivente no martires sira aiha Palásiu Prezidensiál, segunda (16/05).

Tanba ezemplu bainhira veteranu ida deside tuir kursu formasaun ruma iha eskola tékniku-profisionál ka Universidade, siknifika nia hatudu ninia vontade atu hakbi’it-an, no husi hahalok ne’e, nia sei sai hanesan modelu di’ak ba oan sira no ba sosiedade tomak.

“Bainhira hakbi’it-an rasik hodi hetan abilidade foun ida, bele intervein di’ak liu iha prosesu dezenvolvimentu ita-nia rain no kontribui di’ak liu ba hamenus ki’ak no hametin liután ita-nia independénsia no soberania”, afirma nia.

Tanba ne'e, molok mandatu remata iha lorom 19 maiu, nu’udar Prezidente Repúblika, hakarak apela dala ida tan ba kombatente ida-idak no ba sidadaun hothotu atu kaer metin nafatin onra no orgullu pertense ba Povu ida de’it no ba Rai ida de’it mak Timor-Leste.

Tanba Prezidente Republika haree katak durante restaura independénsia nasionál, kompatriota barak tebes mak hatudu barani, determinasaun, patriotizmu no dedikasaun ba komunidade no Nasaun Timor-Leste.

Ho sira-nia hahalok rasik nu’udar grupu ka indivídu, sira hatán dadaun ba sira-nia mehi no objetivu komún iha segunda faze luta libertasaun nasionál nian, ba halakon ki'ak no hatuur justisa sosiál.

Iha ne'e, veteranu balun simu ona rekoñesimentu no valorizasaaun husi Estadu Timor-Leste liuhusi Prémiu Direitus Umanu, balun seidauk.

Husi Ezemplu sira ne’e hotu, mak sei inspira jerasaun foinsa’e sira Timor-Leste ninia futuru hamutuk ho sira, kumpre devér, tuir ida-idak nia kbi’it no matenek, liuhusi dalan ne’ebé de’it, atu haburas rai ida ne’e, ho dezenvolvimentu sustentável no ekilibradu atu bele kore Povu tomak husi ki’ak no mukit.

“Ba segunda faze libertasaun nasionál-halakon ki’ak no hatuur justisa sosiál, ita presiza tanen nafatin sentidu pertensa ida ne’e. Ita ida idak bele kontribui ba rai ida ne’e, nu’udar membru partidu polítiku ka organizasaun sosiál ka relijioza nian ka ho kbi’it rasik, maibé ita labele lakon sentidu koletivu, katak saída de’it mak ita hanoin no halo di’ak, la’ós hadi’ak de’it ita-nia vida maibé sei halo diferensa ba vida ema seluk nian, família ida nian, komunidade nian no Povu tomak nian”, esplika nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« August 2022 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Tempo Timor Networks

Online Counter