“Ha’u espera ho laran haksolok PRezidente foun ne’ebé sei toma pose iha dia 19 kalan, sei bele kontinua hatutan buat di’ak ne’ebé nia predecessor husik hela”, deklara Taur iha Pájina ofisiál PM Taur Matan Ruak ne’ebé www.tempotimor.com asesu, kuarta (18/05).

Iha ne'e, Governu mós fó agradesimentu tebes ba Prezidente Repúblika sesante, Francisco Guterres ‘Lú Olo’ ne'ebe durante nia mandatu hametin pás no estabilidade, sein hamosu krize ruma hodi afeta ba vida nasaun.

Maske durante iha ninia Prezidénsia mosu duni kestaun impase polítika no instabilidade governativa, maibé hein ho kontente Prezidente Repúblika foun, José Ramos Horta ne’ebé sei simu pose iha loron 19 fulan-maiu mai, sei banati obra ida ne’e hodi hametin nafatin páz no estabilidade hodi fó fatin ba dezenvolvimentu.

Tanba ko'alia kona-ba hametin páz no estabilidade iha situasaun agora ne’e importante tebes tanba mundu ohin loron hasoru dezafiu boot liliu krize mundiál hanesan Pandemia COVID-19, funu Rúsia ho Ukránia ne’ebé kuaze afeta ekonomia nasaun hotu iha mundu inklui Timor-Leste.

Tanba ne’e nu’udar aman ba nasaun presiza kontinua hametin páz no estabilidade nu’udar prezente ne’ebé Xefe Estadu fó ba povu iha komemorasaun restaurasaun independénsia ba tinan 20.

Xefe Governu ne'e haree katak situasaun krize ne'ebé karik mosu, nia sei la lori benefísiu ba Timoroan sira, ida ne'e kontráriu oituan tanba sei halo Timoroan mak lakon tempu, lakon rekursu inklui dezenvolvimentu sei marka pasu. (*)