Xefe Suku Samalari, Rui Sertório Siquera Magno, hatete, atu atinji metas Governu nian, ne’ebé povu kuda Governu sosa no atu elemina fós importasaun, prezisa hadi'a irrigasaun ba natar iha teritóriu laran tomak.
"Ita nia Governu tenke investe osan ba Ministru Agrikultura, fó kreditu ba ita nia povu agrikultura para sira bele sosa hand-tractor hadi'a sira nia moris, sé la fó kreditu ba povu agrikultura otomatikamente atu atinji metas elemina importasaun sei susar," dehan nia iha vila antiga, kinta (12/05).
Tanba, produtu importadu mak enkaixa ona iha povu nia kakutak, nune'e Governu prezisa kria kampu traballu temporariamente ba joven sira hodi taka kabubu selu US$3, atu hasa'e volume produsaun iha rai laran.
"Ita dasa rai ho US$3, nusá la obriga ho US$3 ne'e selu ba juventude sira bele ba taka kabubu hanesan kampu traballu ida temporariumente, fulan-3 ba taka kabubu, Governu fó US$3 ko'a hare fó US$3 bele reduz nia volume importasaun," nia akresenta
Husu Governu haree liu-liu ba asuntu setór agrikultura nian, nune'e TL iha rasik nia produtu atu labele depende liu ba nasaun seluk.
Enkuantu natar iha Suku Samalari tinan-2022, hamutuk hektar 1.850 funsiona normal, no hare sira iha natar laran, atinji ona pursentu 50 ho kondisaun normal liu ona faze primeiru, segundu elabora nian, hein terseiru elabora ba faze kolleta nian, maibé antes prosesu taka kabubu irrigasaun mak sai preukupasaun.
"Iha difikuldade mak natureza ne'ebé mosu, udan kuandu tun, irrigasaun tradisional, mota tun intupidu iha kanu hasan sira ne'e, ita la garante nia kuantidade sa'e ga tun, iha rejultadu final, koilleta ba mak ita hatene," nia informa
Natar hektar 1.850 iha Suku Samalari, pertense ba irigasaun Sobabere, Kasameta, Walitaur, Batamata, inklui irigasaun Modobuti, nune'e fulan-abríl tinan-2022, MAP orienta ékipamentu normaliza ona.
Suku Samalari iha Aldeia-4, hanesan Fistau, Ossoluga, Samalari no Sorulai, ho xefe família hamutuk 683 no polulasaun 3.113. (*)