Print this page

Komunidade Venilale Kontribui Osan ba Loron Restaurasaun Independensia

Bandeira Timor-Leste. Bandeira Timor-Leste. Foto Suplay

Tempotimor (Baukau)-Komunidade iha Postu Administrativu Venilale, Munísipiu Baukau, ho konsensia kontribui osan ba selebrasaun loron restaurasaun independensia ba dala XX (20), ne’ebé sei reliza iha loron 20 Fulan-Maiu tinan 2022.

Administradór Postu Administrativu Venilale, Migúel Mendes Manso Guterres, hatete, selebrasaun loron 20 maiu tinan-2022, iha Postu Venilale hahú preparasaun husi loron 07 fulan-maiu.

Atividade, sei selebra ho misa iha loron 19 fulan-maiu, ne’ebé organiza husi estudante Instituisaun Superior Kristal (ISC-sigla portugés) ne'ebé dadaun hala'o estájiu iha Venilale, enkuantu ba seremonia ísar bandeira nasionál iha 20 de maiu nian sei responsável husi estudante eskola katólika São Paul Venilale.

Maibé, orsamentu ba selebrasaun loron 20 maiu, ne'ebé autoriedade Munísipiu Baukau aloka ba kada Postu Administrativu ho montante US$750 limitadu tebes, nune’e foti inisiativa liuhusi kontribuisaun komunidade.

"Nu’udar Venilale oan, laiha dias ida ne'e (20 de maiu) mak laiha funsionária públiku, laiha mós veteranu, laiha mós emprezáriu, ho ida ne'e ami halo ona kontribuisaun tuir konsensia bele suporta orsamentu limitadu ne'e, ha'u labele hatene montate hira," dehan Migúel iha salaun sentru konvensaun Baukau vila antiga, kinta (12/05).

Postu Venilale halo preparasaun ba selebrasaun ne’e, tuir tempu no orsamentu ne'ebé iha, maibé garante sei la’o di’ak, tanba hetan mós kontribuisaun husi komunidade.

"Signifika US$750 ne'e la sufisiente, ba grupu ísar bandeira, loron-loron ita atende sira han hemu, misa mós ita prepara buat koru, oferta seluk mós ba ema sira, sé orsamentu iha karik prepara konsumi ba ema hotu," nia argumenta

Tuir planu, osan husi Munísipiu no kontribuisaun komunidade nian tama ona iha komisaun organizadora nia liman sei halo jestaun ba serimonia ho di’ak. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items