Print this page

CNRT Hakarak Arsenio Esplika Progresu Ró Haksolok ba Públiku

Ro Haksolok ne'ebe para hela iha tasi ibun POrtugal. Ro Haksolok ne'ebe para hela iha tasi ibun POrtugal. Foto Suplay

Tempotimor (Dili)-Bankada Congresso Nacionál de Reconstrução de Timor (CNRT) hakarak Prezidente Autoridade Rejiaun Administrativa Espesial Oekussi Ambeno (RAEOA), Arsenio Bano, esplika progressu konstrusaun ro haksolok ne'ebé mak to'o agora ninia pagamentu atinje ona millaun $30.6 ba públiku.

“Aproveita debate ida ne’e, Bankada CNRT mós hakarak husu progresu konstrusaun Haksolok ne’e to’o ona iha ne’ebé?. Tanba Governu tau tan adisionál millaun $14 iha 2020 ho intensaun katak atu lori “Ró” Haksolok mai Timor-Leste, maibé to’o ona 2022 ferry Haksolok ne’e seidauk mai de’it maske selu tiha ona millaun $30.6”, dehan Vise Xefe Bankada CNRT, Patrocino Fernandes, hafoin halo deklarasaun de votu iha plenária PN, kuarta (11/05).

Tanba iha semana kotuk liuba, Prezidente RAEOA halo fali promesa foun ida dehan katak Ró Haksolok ne'e sei mai Timor-Leste iha 2023, ida ne'e presiza esplikasaun.

Iha ne'e, Bankada CNRT mós husu, saldu millaun $200 ne’ebé RAEOA rai iha Banku Komersiál ne’e nia jurus iha hira no se mak aproveita jurus sira ne’e.

Maske durante debate Orsamentu Retifikativu, Bankada Fretilin levanta beibeik billaun $14 ne’ebé Governu anterior hasai husi Fundu Petrolíferu, maibé Bankada CNRT hakarak informa ba povu tomak katak husi 2007 to’o 2014 CNRT mak lidera Governu no hasai osan Billaun $9 husi Fundu Petrolíferu, enkuantu husi 2015 to’o 2017 Primeiru Ministru mai husi FRETILIN no hasai Billaun $5 husi Fundu Petrolíferu.

Husi billaun 5 ne'ebe foti husi governasaun partidu FRETILIN nian ne'e inklina mós millaun $700 ba RAEOA ne’ebé ninia ezekusaun laiha relatóriu no kamara konta rasik deteta iha irregularidade barak, hanesan akizisaun ba Ferry Haksolok no Aviaun segunda maun ne’ebé sosa ho folin aviaun foun nian.

Bankada CNRT mós duvida ho deklarasaun husi bankada Governu tanba kestiona durante tinan 10 laiha dezenvolvimentu.

Maibé bankada Governu mós haluha-an katak durante tinan 5 ikus ne’e, deputadu sira tun ba terrenu hodi halo fiskalizasaun ba projetu hanesan estrada ponte, eskola, ospitál, eletrisidade, no infraestrutura bázika sira seluk ne’ebé halo iha tinan sanulu liubá. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items