Komité Diresaun Konjunta ne’e ninia kna'ar atu fornese orientasaun estratéjika, fidusiáriu no jestaun supervizaun no koordenasaun ba projetu ne'e no relata ba Komisaun Inter-Ministeriál ba PAN-VBJ tinan ida dala ida atu fó orientasaun no kóordenasaun konsultivu ho parseiru xave sira.
Iha enkontru ne'e, membru Komité Diresaun Konjunta sira diskute no aprova relatóriu anuál 2021 ne'ebé relata progresu ba prevensaun violénsia bazeia ba jéneru (VBJ), kria espasu públiku ne'ebé seguru no fahe koñesimentu ba resposta multi-setoriól.
Planu atividade ba tinan 2022 propoin kontinuasaun hodi hasa'e muda norma sosiál, prevensaun primária, hasa'e kapasidade pesoál saúde no setór justisa iha responde multi-setoriál.
Projetu Hamutuk ba Igualdade lansa ona iha fulan-fevereiru tinan 2021 ho apoiu finanseiru millaun 7.7 husi KOICA.
Projetu ne'e kobre munisípiu Dili, Covalima, Baukau no Rejiaun Administrativa Espesiál Oekussi Ambeno (RAEOA) no define ona atu transforma atitude, hahalok no norma sosiál sira ne'ebé kondusivu ba prevene VBJ, hadi’ak kualidade servisu esensiál sira ba feto no labarik feto sira no hasa'e lejizlasaun no polítika ne'ebé apoia eliminasaun VBJ no forma diskriminasaun sira seluk hasoru feto no labarik-feto sira.
Tuir dadus husi DHS 2016, kuaze metade husi feto kaben-na'in sira iha la'en ho hahalok kontrola. Maibé liután ne'e, feto sira konkorda katak la'en iha razaun atu baku sira-nia feen. Hó mentalidade ida ne'e vizivel nafatin iha komunidade sira no nasaun laran, ho projetu ne'ebé foka ba VBJ ne'e importante tebes.
“Hamutuk ba Igualdade ne’e projetu ida ne'ebé merese hetan apresiasaun tanba koordenasaun no kolaborasaun ho nível aas iha entidade barak ne’e ita seidauk haree iha nasaun barak. Ida ne'e bazeia ba prátika di’ak sira hafoin kompleta lakuna sira iha área ne'ebé presiza apoia atu komplementa kolaborasaun no liga ideia sira hosi inisiativa relevante sira hanesan Inisiativa Spotlight no projetu Nabilan atu haforsa parseria sira-ne'e hodi kontribui atu kria ekosistema sistemátiku ba prevensaun no responde ba VBJ ne'ebé orienta hosi PAN VBJ”, dehan Koordenadór Rezidente Nasaun Unidas, Roy Trivedy, iha Salaun Maubara Room Timor-Plaza, Komoro, tersa (10/05).
Ba difikuldade oioin husi krize COVID-19 ne'ebé daudaun ne'e la'o hela, ne'ebé reklama katak ema millaun mak lakon sira-nia moris no estraga ona ekonomia mundiál, ba dezastre naturál ne'ebé estraga Timoroan barak nia moris. Husi buat hirak ne’e, aumenta risku ba feto no labarik-feto sira atu esperiénsia VBJ.
Vise Diretora Nasionál, Sookjin Byun esplika, projetu ne’e ninia intervensaun atu hamenus problema ida ne'e, atu hatan ba kondisaun sira hanesan ne'e, Governu Timor-Leste, parseiru Nasaun Unidas, organizasaun sosiedade sívil sira tau ona esforsu ne'ebé maka’as hodi proteje feto no labarik-feto sira.
“Liuhusi inisiativa Kampus Seguru, ami servisu atu kria espasu seguru ne’ebé livre husi asediu seksuál no violénsia hasoru feto, ami hakbi’it ona feto no sira-nia parseiru atu sai empreendedór, hadi’ak prestadór kuidadu saúde no parte seguransa sira hodi responde VBJ, ami mós apoiu ona feto no labarik-feto sira atubele hetan protesaun di’ak liu iha sentru evakuasaun no prepara sira-nia seguransa ba dizastre sira iha futuru”, informa nia.
Projetu Hamutuk ba Igualdade realiza Komité Diresaun Konjunta daruak ho autoridade husi Kordenadór Rezidensia ONU no hetan partisipasaun husi Sekretária Estadu ba Igualdade no Inkluzaun (SEII), Korea International Cooperation Agency (KOICA), Komisaun PAN-VBJ Ministériu Edukasaun, Juventude no Desportu, Ministériu Saúde, Ministériu Interior-Sekretária Estadu Protesaun Sivil, Ministériu Justisa, Defensor Públiku, Prokurador Jerál, Polisia Nasional Timor-Leste no mos reprezentante hosi munisipiu haat (Dili, Baucau, Covalima no Rejiaun Administrativa Espesial Oe-Cusse Ambeno), reprezentante hosi sosiedade sivil no ajensia ONU ne’ebé envolve iha projetu ne’e (UN Women, UNFPA, UNDP no IOM). (*)
