“Orsamentu Retifikativu ida ne'e la prienxe rekezitu legal sira tuir artigu 8 e 9 iha Lei Fundu Petroliferu. Tanba saida, Governu la hato'o relatóriu ne'ebé mak espesifiku ba Rendimentu Sustentavel Estimamadu (RSE)”, dehan Carmelita hafoin partisipa debate jeneralidade ba Proposta Orsamentu Retifikativu iha plenária PN, segunda (09/05).
Ba preokupasaun ne'e Bankada CNRT haruka ona karta ba Governu liuhusi Prezidente Parlamentu Nasionál (PN), Aniceto Longuinhos Guterres Lopes atubele fó resposta.
Tanba relatóriu espesifiku RSE no transferensia tinan 2021 inklui relatóriu ne'ebé mak ko'alia kona-ba reduzir rendimentu sustentavel estimativa mós Governu la hato'o.
Iha ne’e Governu mós la hato'o relatóriu husi auditória independente ida ne'ebé atu sertifika kona-ba estimativa redusaun RSE tuir artigu 9 iha Lei Fundu Petroliferu.
Maibé Governu só hato'o de'it mak Proposta Lei Orsamentu Retifikativu ho karta ofisiu ida husi Ministru Finansas (MF), Rui Augusto Gomes ba iha Primeiru Ministru depois Primeiru Ministru haruka mai iha Parlamentu Nasionál.
Hatán ba kestaun ne'e, Ministru Finansas (MF), Rui Augusto Gomes hatete, dadaun parte Governu prepara hela atu fó resposta ba karta ne'ebé haruka husi Bankada CNRT iha loron 9 maiu 2022.
“Karta ne'ebé foin dadaun ami simu husi bankada CNRT, ami sei fó fila resposta depois de almosu, kona-ba ida ne'e”, afirma nia. (*)