“Ho ida ne'e Governu deside atu kria Sekretáriu Estadu ida tau matan ba ita-nia komunidade sira iha rai liur, hodi reforsa serbisu Ministériu Negósiu Estranjeiru, atu tau matan ba sira, iha ne'ebé de’it sira hela ba. Tanba sira mós rai ida ne'e nia oan, sira mós fó nia kontribusaun ba nasaun ida ne'e”, dehan PM Taur, iha Salaun Ótel Timor Lodge Komoro, sesta (06/05).
Xefe Governu fó sai deklarasaun ne’e bainhira Partisipa iha serimónia despedida no asina deklarasaun entre família traballadór ho SEFOPE kona-ba traballadór Timoroan na'in-87 ne'ebé atu ba serbisu iha Korea Súl.
Tanba iha tinan 2021 Timoroan sira iha Austrália, Korea, Irlánda, Inglaterra, no husi rai ne'ebé de'it hatama reseita hamutuk millaun $121 ba kofre estadu.
“Ida ne'e di'ak tebes. Ita-boot sira haree, iha 2021 ita-nia oan sira, família sira, Timoroan sira iha rai liur haruka osan mai 121 milhões dolar amerikanu, ba ita-nia kofre estadu”, afirma Taur.
Tanba uluk reseita Timor-Leste nia ne'e mai husi fundu petrolifeira no kafe, maibé dadaun ne'e traballadór no Timoroan sira ne'ebé iha rai liur ne’ebé kontribui.
“Ita-nia reseita uluk minarai mak premeiru, kafésegundu, maibé agora sira mak segundu fali, kafé ba tiha kotuk ona, ida ne'e kontribui maka’as ba dezenvolvimentu iha nasaun ne'e”, informa nia. (*)