Proposta rezolusaun ne’e aprezenta husi Ministra Negósiu Estranjeirus no Kooperasaun, Adaljiza Albertina Xavier Reis Magno ba Konsellu Ministru ho halo diskusaun no aprovasaun.

“Projetu proposta rezolusaun rua ne’e ba Parlamentu Nasionál, kona-ba ratifikasaun ba adezaun konvensaun kona-ba Direitu Ema ho Defisiénsia no ratifikasaun ba adezaun ba Protokolu Opsionál ba Konvensaun kona-ba Direitu Ema ho Defisiénsia”, dehan Ministru Prezidénsia Konsellu Ministru, Fidelis Manuel Leite Magalhães, iha Palásiu Governu, kuarta (04/05).

Konvensaun ne’e hanesan instrumentu direitu internasionál ne’ebé ho objetivu romove, proteze no garante katak ema ho defisiénsia bele hetan diretu umanu no liberdade fundamentál hothotu ho forma hanesan hodi promove respeitu ba ninia dignidade rasik.

“Espera katak ho aprovasaun ne’ebé Konsellu Ministru halo no ratifikasaun hira ne’ebé sei tuir mai, konvensaun rua ne’e sei sai hanesan matadalan ba ita atu halo esforsu ne’ebé di’ak liután hodi bele dignifika no fó protesaun ba ema ho difisiénsia iha ita-nia rain, nune’e mós bele partisipa pro-ativu iha prosesu tomak dezenvolvimentu nian,”

Aprovasaun ne’e nu’udar pasu boot ida ne’ebé mak Governu halo ona hodi adere ba konvensaun ne’e, espera katak órgaun sira hotu Governu nian sei halo servisu maka’as hodi implementa kompromisu sira ne’ebé hatuur ona iha konvensaun ne’e rasik. (*)