“Primeiru Ministru husu ba ami progresu servisu, liliu ba ezekusaun projetu sira ne’ebé estragu hanesan ponte no estrada inklui estragu impaktu husi kalamidade loron 4 abril to’o agora MOP rezolve ona projetu hira, tanba ne'e ami relata progresu”, informa Vise Ministru Obras Públikas, Lino ba jornalista sira hafoin enkontru ho Xefe Governu, iha palásiu Governu, kinta (28/04).

Iha ekontru ne’ebé halo ho Xefe Governu aprezenta mós kona-ba burokrasia Governu nian liliu pagamentu ba empreza sira ne’ebé durante ne’e mosu.

Xefe Governu hato'o preokupasaun no orienta MOP atu aselera projetu emerjénsia sira liliu kona-ba estrada liga Kasnafar-Sarlala no ponte Bekussi ne'ebé, bainhira udan fó impaktu ema-nia vida no movimentasaun transporte públiku no privadu.

Kona-ba rekonstrusaun projetu Bekussi, MOP iha ona alternativu rua mak, sobu ponte ida iha Mota Masin, munisípiu Covalima nian ne'ebé to'o oras ne'e la uza ona hodi rekonstrui ponte temporáriu iha Bekussi no aumezmu tempu aselera prosesu dezeñu no tenderizasaun ba ponte foun.

Husi opsaun rua ne'e la'o hotu ho prinsípiu atu asegura orientasaun Priméiru Ministru nian, kona-ba sobu ponte Mota Masin halo rekonstrusaun temporáriu iha Bekussi ne'e nia dezeñu hetan ona verifikasaun husi Ajensia Dezenvolvimentu Nasionál (ADN) tanba ne'e iha fulan-maiu tama ona ba faze konstrusaun.

Ministériu Obras Públikas sei halo esforsu koordena ho Ajénsia Dezenvolvimentu Nasionál (ADN) ba verifikasaun projetu sira kauza husi kalamidade tinan kotuk, 04 Abril 2021.

Daudauk ne'e, MOP loke ona konkursu públiku ba projetu 10 resin hodi rezolve estragu sira, restante sei iha prosesu dezeñu, bainhira remata sei enkamina ba ADN hodi halo verifikasaun. (*)