Deputadu husi Bankada FRETILIN Fabião de Oliveira hatete, tuir informasaun ne’ebé nia simu, durante ne’e autoridade HNGV autoriza sunu foer iha resintu HNGV.
"Loloos Hospital Nasional Guidu Valadares labele sunu foer, tanba ne'e fó impaktu direta ba ita-nia pasiente sira, liu-liu inspiratóriu, ida ne'e fallansu boot ne'ebé autoriedade ospital nian halo, tanba sunu lixu nia fatin mak iha Tibar," dehan Deputadu Fretilin ne’e iha PN, Kuarta (09/10/19).
Tuir nia, HNGV tenke prepara karreta tula foer nian durante oras 24 nia laran nune’e bele tula kedan foer ba fatin so’e foer iha Tibar.
Iha fatin hanesan, deputadu PLP Abel Pires da Silva afirma, foer iha HNGV barak mak foer kímiku tanba ne'e tenke kuidadu.
"Lixu ne'ebé iha iha ospital ne'e barak mak iha relasaun ho ema nia moras, tanba ne'e tenke trata sasan sira ne'e ho kuidadu, tanba bele afeta ba pasiente sira inklui mós ba pesoál sira ne'ebé hala’o serbisu iha ospital, tanba ne'e sunu loos de'it ne'e labele, maibé halibur no Lori ba nia fatin mak sunu," dehan Abel.
Tan ne’e, nia husu ba autoridade HNGV atu hapara ona pratika sunu foer iha resintu HNGV tanba bele fó perigu ba ema-nia vida no mós aumenta poluisaun iha kapital Dili.