Login to your account

Username *
Password *
Remember Me

Deputada Carmelita ‘Defende-an’ Kontra Deklarasaun Oho Bispu Dom Carlos

Deputada Bankada Congresso Nacionál de Reconstrução de Timor (CNRT), Carmelita Caetano Monis. Deputada Bankada Congresso Nacionál de Reconstrução de Timor (CNRT), Carmelita Caetano Monis. Foto Suplay

Tempotimor (Dili)-Deputada Bankada Congresso Nacionál de Reconstrução de Timor (CNRT), Carmelita Caetano Monis, defende-an kontra deklarasaun oho Amu Bispu Dom Carlos Ximenes Belo, iha tempu okupasaun Indonézia.

Tanba deklarasaun ne’ebé Deputadu husi bankada Partidu Libertasaun Popular (PLP), Noe da Silva ‘Buka Tuir’ fó sai iha mídia sosiál liliu Facebook hodi dun ba Carmelita Caetano Monis atu oho Amu Bispu Dom Carlos

“Deskulpa ha'u nunka halo buat ida ne'e nunka, ha'u iha tempu Indonezia ha'u mós membru Fundasaun Dom Carlos ne'ebé mak selebra diálogu Dare I ho Dare II, señor Prezidente rasik iha ne'eba nu’udar prezidente komisaun organizadora ba diálogu Dare I ho Dare II, e antes Amu Bispu Dom Carlos sai husi Timor atu ba iha Portugal, Amu Bispu sei ba jantar iha ha'u-nia uma iha Dare II ne'ebé mak konvida mós señor Prezidente ho maluk sira selseluk tán, ba hán iha ha'u-nia uma”, esplika Carmelita iha plenária Parlamentu Nasionál, tersa (26/04).

Tanba deklarasaun ne'ebé deputadu Buka Tuir hakerek iha mídia sosiál-facebook hatete “Obrigadu ba maun Eduardo Filipe Ximenes ne'ebé fahe tutan Jenerál Lere Anan Timur-LAT nia liafuan ida dehan Lú Olo sei lakon tanba Lú Olo ho Mari nia lisan la hanesan. Agora ha'u-nia pergunta Maun boot Xanana Gusmão ho Kalbuadi Lai nia lisan hanesan ka la'e?. Xanana Gusmão Komandante en Xefe das FALINTIL maibé Kalbuadi Lai komandante supremu Carmelita nian atu ba oho Amu Bispu Dom Carlos Ximenes Belo”.

Maibé haree ba deklarasaun ne'e, Carmelita hatete, ne'e sai hanesan liafuan todan ida ne'ebé mak fó ba nia durante iha tinan hirak nia laran, hahú kedas iha 2007, kuandu nia envolve-an iha partidu polítiku.

“Ha'u atu hatete katak kontribuisaun ha'u-nia ba rai ida ne'e la barak liu, maibé ha’u hahú husi kedas 1988-1989, kuandu ha’u mai foti buat balun ne'ebé kee husi ita-nia joven momentu ne'eba, ne'ebé fuan barani tebtebes, ida mak agora sei moris Komandante Pedro Klau Fuik koiñesidu ho Adano ida fali mak eis Deputadu José Manuel Fernandes ‘Nakfila’, e ha'u hahú ha’u-nia kontribuisaun iha momentu ne'ebé ita-nia joven sira ke barani tebtebes”, deklara nia.

Tanba ne'e, husu deputadu Buka Tuir atu hapara ona ho intensaun insultu malu, hatun ema nia dignidade inklui hamate ema nia karatér públikamente.

"Ne'ebé ita to'o ona, ho insulta malu bebeik ida hanesan ne'e, hatun ema nia dignidade, hamate ema nia karater públikamente, kuandu ita-boot sira hatete katak dehan otonomista ka saida ka, ha’u la intrese tanba ha'u la halo buat ida ne'ebé ke ha'u la halo, mais to'o ida Bee Neno Amu Bispu, oho amu bispu ne'e demais liu ona kuitadu”, afirma nia.

Ba deklarasaun oho Amu Bispu ne'e, Carmelita esplika iha facebook Amu Bispu haruka Amárdio ne'ebé nia oan haki'ak, tau iha facebook dehan katak buat ne'e nunka akontese, Amu Bispu nia kondutór ho naran Justino mós tau iha facebook katak buat ne'e nunka akontese.

“Ikus liu ha'u-nia kolega Rui Hanjan ba hasoru Amu Bispu iha Portugál husu kona-ba buat ne'e, Amu Bispu husu rasik dehan tau iha facebook dehan katak buat ne'e nunka akontese”, haktuir nia.

Tanba ne’e, husu ba sidadaun timoroan tomak para ona ho atetude hatun malu kona-ba ema prestijiu ba hamate ema nia karkter públikamente maibé tenke konsidera mesmu ke oituan ka barak ema hothotu fó kontribuisaun ba rai ida ne'e, atu ukun rasik-an.

Hatán ba kestaun ne'e, Deputadu Bankada PLP, Noe da Silva ‘Buka Tuir’ hatete, deklarasaun sira ne'ebé mosu iha mídia sosiál ne'e nia autór loloos mak Media Center tanba halo deklarasaun hodi akuza Jenerál Taur Matan Ruak nu’udar ema oportunista.

“Informasaun no deklarasaun sira ne'e mai desde iha tempu Indonézia e hahú husi ukun-an ne'e mós informasaun sira ne'e lansa barak loos, ita halo kauza, depois iha tan reasaun husi ita-boot sira partidu, ita-boot sira nia media agora mai halo akuzasaun barbarak, tanba sa iha tempu ne'eba mai ita-boot sira la halo akuzasaun, ita-boot sira-nia deklarasaun rasik hatete katak Taur Matan Ruak ne'e oportunista, APODETE, oportunista, traidór”, esplika nia.

Ho deklarsaun ne'e nu’udar deputadu sente katak sira mós iha diretu atu defende sira-nia lideransa Jenerál Taur Matan Ruak husi akuzasaun sira ne'e.

"Se ráque Taur Matan Ruak ne'e ema oportunista duni, traidór duni, seja ami la’ós líder maka’as hanesan ita-boot sira-nian maibé ami mós iha dignidade, ami mós iha morál atu defende ami-nia líder, liliu Media Center ne'e mak halo akuzasaun barbarak”, hatete nia.

Ba akuzasaun sira ne'e, momentu ne'eba nia rasik fó hatene ba deputada Carmelita Caetano Monis atu hatete ba Media Center atu labele halo akuzasaun arbiru ba ema.

"Sé ita-boot sira halo akuzasaun barbarak ba ami, ami labele defende ami-nia an, satán ita iha tempu kampaña ninian”, afirma nia. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« August 2022 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Tempo Timor Networks

Online Counter