Prezidente Komisaun Nasionál ba Elisaun sitra (CNE), José Agustinho Belo hatete, iha tempu legal ba CNE ne’e iha 72 oras hodi halo apuramentu nasionál no verfikasaun votu nulu ne’ebé iha, depois CNE halo dilibera kona-ba akta rezultadu ninia.

“Komesa aban (22/04) dader ita halo ona apuramentu nasionál, ita iha tempu 72 oras para halo verfikasaun votu nulu ne’ebé iha, kontajen husi rezultadu ne’ebe iha, numerikamente ita haree hela, atu nune’e halo verfika didi’ak. Depois verifika hotu ita mós iha 72 oras atu halo dilibera kona-ba akta rezultadu ninian no ita sei fó sai rezultadu iha sede CNE nian atu nune’e públiku no kandidatu sira bele asesu”, dehan José Belo liuhusi Komferénsia Imprensa iha Sentru Mídia CNE, kinta (21/04).

Nune'e prosesu elisaun segunda ronde ne’e la'o di'ak, rezultadu sira ne’ebé iha akta inisiál fiskál hothotu simu, iha reklamasaun balun kona-ba buletin, maibé nia númeru ne’e ki’ikoan, depois sira transporta husi sentru votasaun mai to’o iha Munisípiu no halo konsilasaun ba akta sira ne’e.

“Rezultadu lais liu tanba ita-nia kandidatu na’in-rua de'it, e ohin urnas sira ne’e kuaze tama hotu ona hela de’it mak Munisípiu Covalima mas iha dalan ona no husi estranjeriu pasti to’o iha loron ida ka rua”, esplika nia.

Tanba iha elisaun segunda volta ne’e la’o di'ak, maske iha problema ki’ik ne’ebé akontese iha sentru votasaun maibé CNE liuhusi komisáriu sira halo kedas atuasaun hamutuk ho Sekretáriu Tékniku Admistrasaun Eleitoral (STAE) no administadór postu hodi trasa.

“Iha sentru votasaun prosesu la’o di’ak, iha fatin balun maka ita sente dehan tanba deskluidu ita-nia brigada sira katak karimbu ne’ebé sira tau ne’e la'ós 2022 nian maibé karimbu balun 2018, ho ida ne’e CNE liuhusi  komisáriu sira halo kedas atuasaun hamutuk ho STAE no daminstadór postu sira ita trasa hotu kedas”, hatete nia.

Nune’e mós iha Munisípiu Baukau Postu Administrativu Bagia iha duni buletin balun ne’ebé mak foer maibé iha votasaun ne’e esklui kedas, no troka kedas buletin votu ne’e ho boletin votu ne’ebé rezervadu elisaun prezidensiál nian.

“Maibé problema ki’ikoan sira ne’ebé ita rejitu ne’e la implika kona-ba elisaun no ita-nia eleitór sira mós la hein kleur, ne’e hanesan situasaun sira ne’ebé ita iha hela”, informa nia. (*)