Print this page

Igreja Husu Timoroan Hili Prezidente Repúblika Foun Tuir Dalan Jesus

Diretór Programa Edukasaun Sidadania, Pe. Domingos Soares Maubere. Diretór Programa Edukasaun Sidadania, Pe. Domingos Soares Maubere. Foto Suplay

Tempotimor (Dili)-Igreja Katólika Timor-Leste liuhusi Konferénsia Episkopál Timorense (CET), Komisaun Nasionál Justisa Páz no Integridade Kriasaun (JPIC) ho Programa Edukasaun ba Sidadania (PEC) husu sarani timoroan atu hili Prezidente Repúblika (PR) foun ne’ebé tuir dalan jesus hanorin iha igreja.

“Tanba ne'e, husi biban ida ne'e ami mai husu ba sarani ho sidadaun hotu, tuir lia menon amu bispu sira-nian atu aban labele falta ba vota ho konsiénsia, nu’udar diretu no obrigasaun morál, iha maromak, nasaun ho matebian sira-nia oin. Maromak haruka nia oan mai, hodi hatudu dalan foun-dalan domin nian, ba ita husi nia oan mane, Jesus Kristu, ne’ebé hanorin hela ita husi igreja”, dehan Diretór Programa Edukasaun Sidadania, Pe. Domingos Soares Maubere, liuhusi konferénsia imprensa iha Balide, segunda (18/04).

Ba Eleisaun Prezidensiál segundu volta ne'eb’e sei hala'o iha loron 19 fulan-abril, mak sarani timoroan labele falta atu ba vota.

Iha Livro Génesis haree kona-ba kultura, nu’udar ema moris hakarak moris iha hakmatek nian laran, tuir maromak nia hakarak no ida ne'ebé mak nia haki'ak, no tuir dalan ne'ebé nia hatudu husi nia oan mane, Jesus Kristu, ne'ebé hanorin hela husi igreja.

Tanba ne’e, lgreja mai hanorin ema envolve-an iha polítika hodi hala'o hamutuk moris nasaun nian, iha aspetu hothotu, inklui iha hili governante sira. Hothotu iha direitu no dever atu kontribui ho nia votu livre atu promove bem komun, ema hothotu nia di’ak. (Gaudium et Spes,75).

Ho Eleisaun segunda volta nian, ema hotu tenke hadomi nasaun ne'e hanesan grasa boot husi leten, maibé manan mós husi as'uain rihun nia rán fakar no ruin naklekar iha Timor laran tomak mak manán, ne'ebé ema hotu tenke tane nafatin erói sira.

Bainhira ema hotu kontribui ba nasaun ninia prosperidade, husi nia partisipasaun ativa iha politika, hanesan ba vota iha eleisaun sira, tuir Konstituisaun Art. 47 ho Art. 65 hatudu katak nia ema ne'ebé tane erói sira.

“Ita hein atu CNE ho STAE hala'o sira-nia kna’ar ho kompeténsia, transparénsia no imparsialidade atu hothotu bele partisipa iha eleisaun, nu’udar festa demokrásia nian”, dehan nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items