Magnífiku Reitór Universidade Nasionál Timor Lorosa'e (UNTL), João Soares Martins, apela ba sidadaun Timoroan tomak ne'ebé sei ezerse nia direitu hodi hili Prezidente Repúblika foun ba períodu 2022-2017 ne'ebé kontinua apoiu UNTL iha períodu oin mai.

“UNTL apela atu kandidatu ne'ebé povu hili atu sai Prezidente Repúblika atubele apoiu nafatin UNTL, atu Instituisaun ne'e bele halo nia kna'ar di’ak liután ba rai Timor-Leste nia futuru”, dehan Reitór UNTL, João iha pájina ofisiál UNTL ne'ebé www.tempotimor.com asesu, kinta (15/04).

Deklarasaun ne'e bazeia ba kandidatu Prezidente Repúblika, José Manuel Ramos Horta ne'ebé hatete, iha Debate Públiku katak, produtu UNTL liliu Fakuldade Direitu ne'ebé la hatene interpreta Konstituisaun Repúblika Demokrátika Timor-Leste (K-RDTL).

UNTL haksolok tebe-tebes tanba UNTL nia naran temi iha Debate Prezidensiál 2022 nian, maibé UNTL lamenta tebe-tebes ho liafuan ne'ebé Kandidatu Prezidente Repúblika, José Ramos Horta hasai iha Debate Prezidensiál ne'ebé realiza iha loron 13abril 2022, hodi hatun imajen UNTL nian hodi minimiza nia kualidade.

Tanba dala hira kedas Kandidatu Prezidente Repúblika José Ramos Horta repete liafuan ne'ebé atu dezakredita UNTL nia imajen husi de'it nia impresaun rasik.

Hafoin Debate, Kandidatu Prezidente Repúblika ho númeru Sorteiu 2 José Ramus Horta fó sai fali dekralasaun ida katak, iha nia debate ne'ebé hatete Ramos Horta la fiar ona UNTL ne'e halimar de'it ho kandidatu Prezidente Repúblika, Francisco Guterres ‘Lú Olo’.

“Ohin kalan iha Debate ho Kandidatu Lú Olo, ha'u halimar ho Lú Olo hatete ha'u la fiar ona UNTL tan hasa'e estudante Direitu ke halo interpretasaun sabraut ba K-RDTL ne'e halimar de'it”, Horta deklara iha pájina ofisiál José Ramos Horta.

Tanba ne’e, sei fiar nafatin UNTL kualidade dosente no alunu sira, no universidade ida ne'ebé antigu liu ho kualidade aas iha Timor-Leste.

Ho ida ne’e, UNTL respeita nia profesór, funsionáriu administrativu no estudante ida-idak nia sentidu votu no lakohi influénsia ema ida atu vota ba kandidatu ne'ebé de'it. Maibé UNTL hakarak de'it defende nia-an iha Estadu no Sosiedade tomak nia oin.

Tanba UNTL estabelesidu husi tinan 2000, nu'udar Instituisaun Estadu nian. Nia sujeita ba avaliasaun filafila husi instituisaun akreditasaun no avaliasaun independente ANAAA, membru júri sira kompostu husi avaliadór nasionál no internasionál, ne'ebé hetan predikadu akreditasaun A.

Ho ida ne'e rekuñese duni katak, UNTLkontribui ona durante tinan ruanulu-resin ba formasaun rekursu umanu ne'ebé kontribui ba funsionamentu Estadu no Nasaun Timor-Leste nomós prepara rekursu umanu ba jerasaun foun sira tuir mai, nafatin ba nafatin. (*)