Diretór Asosiasaun HAK, Sisto dos Santos, rekomenda ba Parlamentu Nasionál atu hamosu rezolusaun estraordináriu hodi fó kondisaun ba CNE no STAE, hodi organiza eleitór sira, bele vota ho flexibilidade iha fatin ne'ebé de'it.

“Husu ba CNE no STAE atu hadiak mekanizme eleisaun Prezidensiál sira, ba futuru fó biban ba ema hotu atu vota iha ne'ebé de'it, hodi asegura populasaun sira-nia partisipasaun iha eleisaun, atu sira la lakon direitu ba vota, partikularmente iha sentru votasaun iha teritóriu laran”, dehan Sisto dos Santos iha kna'ar fatin Farol, kuarta (13/03).

Ba CNE no STAE presiza review oras normál vota nian, bele termina oras votasaun husi tuku 03:00 axtende tan to’o tuku 04:30 atu votante sira hotu iha biban ho tempu adekuadu hodi ezerse sira-nia direiu votu.

“Husu ba CNE atu imprime (print) mós buletim votu bolu Breil atu ema ho defisiente sira bele vota tuir nia konsiénsia, no sentru votasaun sira presiza kria rampa hodi fasilita ema ho defisiente fiziku mak uza kadeira roda sira bele asesu ba kabina votu hodi ezerse nia direitu, ba pontu ida ne'e HAK mós nota katak biar difísil atu realiza iha tempu badak maibé bele konsidera ba tempu oin mai”, afirma nia.

Enkuantu HAK iha esperansa katak husi rekomendasaun sira bele sai konsiderasaun ba parte tomak liliu Orgaun Eleitora no Ministériu Interior hodi asegura votante sira iha Kapitál Dili iha tempu votasaun nian iha loron 19 Abril, votante sira iha Dili laran sei la lakon sira-nia direitu votu.

“HAK fiar tebes katak ho eselénsia sira hotu nia prudensia ba situasuan espesifiku ida ne'e sei hametin no haburas liután taxa partisipasaun husi eleitór sira”, dehan nia. (*)