“Ha'u polítiku mesmu ki'ik, mais kakutak la ki'ik, ha'u-nia matan ne'e atu haree, atu koiñese, karik o labele, koko ba, labele mak labele. Maibé ha'u fi'ar katak iha CNRT matenek seidauk iha, mak tenke presta maun Ramos Horta hodi ba kandidatu ba sira-nia prezidente, ba ha'u kuandu kaer partidu boot ne'e ha'u moe loos”, dehan Naimori hafoin partisipa kampaña husi Kandidatu Francisco Guterres ‘Lú Olo’, iha munisípiu Ainaro, segunda (11/04).
Tanba KHUNTO rasik nu’udar partidu ki'ik maibé aprezenta rasik ninia kandidatu atubele kompete iha eleisaun, purtantu partidu CNRT ne'e partidu boot, maibé fó fali konfiansa ba Jose Ramos Horta sai nu’udar kandidatura Prezidente Repúblika.
“Ha’u so hatete de'it, iha ema barak ko’alia katak ita hili maun Ramos Horta di'ak liu, mais só hatete de'it buat ida ba imi, ita hili maun Ramos Horta di'ak maibé nia la'ós kandidatu mai husi partidu ida. Tanba nia la’ós Partidu CNRT, nia partidu FRETILIN ninia ema, imi CNRT-PD bele vota, maibé vota nafatin ba partidu FRETILIN mak ida ne'e, di'ak liu vota ba ida Lú Olo, ida ass liu ne'e, nusa la ba loos ida orijinál (asli) ne'e, loos ka la'e”, esplika Naimoria.
Dadauk partidu CNRT nian mai ko'alia iha Ainaro, maibé ukuk sira mak dehan KHUNTO mak at liu, maibé iha uma-uma sira ne'ebé bele rona, KHUNTO bele at mais KHUNTO kandidatu nia ema, enkuantu CNRT ne'ebé matenek ne'e laiha kandidatu, ida ne'e komik loos.
Nune'e mós ba Vise Prezidente Partidu CNRT, Gil da Costa Monteiro ‘Oan Soru’ uluk kuandu ba Ainaro tama sai uma, CNRT rasik abandona no laliga nia, maibé KHUNTO mak bolu fali nia hodi fó kargu Sekretáriu Estadu.
Maibé ikus Oan Soru nega hodi, tama uma sai uma, ba troka fali Vise Prezidente Mauhunu, bolu fali militante KHUNTO hodi fó bandeira ba sira dehan katak halo deklarasaun afilia ba CNRT, maibé militant sira fó sai dehan sira mak obriga de'it militante KHUNTO atu afilia.
“O de'it ema la koiñese, ha'u rasik mak sei fó kargu ba o, o ba konvida fali ema seluk tuir fali o, komik loos, loos ka la'e, ne'ebé buat hothotu tenke la'o tuir nia prosesu hanesan ne'e, ne'e komik loos”, hatete Naimori. (*)