“Ha'u hakarak fó rekomendasaun katak, iha Aldeia Asanunu ho Fatiliri ne'ebé antes Timor ukun-an to'o agora nunka asesu buat ruma, liliu estrada, eletrisidade, bee-moos”, dehan Xefe Aldeia Asanunu, Germias Boavida Guterres, hafoin partisipa atividade diálogu ho Kandidatu José Ramos Horta iha Aldeia Asanunu, Suku Soba, segunda (11/04).
Nune’e atu fó solusuan ba problema infraestrutura ne'e, Prezidente Repúblika mak presiza fó hanoin nafatin ba Governu tanba aldeia rua ne'e hahu husi ukun aan to'o agora seidauk asesu ba estrada, bee-moos, no Eletrisidade.
“Ami husu ba Prezidente foun, Governu foun se bele aban bainrua tau matan ba, tanba iha ne'e aldeia rua, la asesu ba estrada, eletrisidade, bee-moos”, afirma nia.
Fundadór Ensinu Báziku Filiál (EBF) Asanunu, Tereza da Costa Sarmento hatete, kona-ba preokupasaun ne'ebé durante ne'e, sira-nia estudante Ensinu Báziku Filiál Asanunu enfrenta mak estrada, nomós Eletrisidade inklui Bee-Moos, tanba seidauk konstrui.
Eskola EBF Asananu ne'ebé hari’i iha tinan 2008 ho Aula tolu maibé profesora ida de'it mak hanorin to'o iha 2015, no agora mak hetan apoiu husi funsionáriu ida no Profesór Voluntáriu ida.
Tanba ko'alia kona-ba diretu ne'e, labarik sira iha diretu atu asesu ba edukasaun, karik labarik aban bainrua hetan matenek sira bele defende sira-nia rai Timor-Leste, la'ós ba fali rai seluk tán.
“Uluk, Tinan ida de'it estadu rekoiñese, no estadu rekoiñese tiha, sira fó de'it mak materiál konstrui edifísiu, ita haree edifísiu ida iha ne'eba, maibé iha sala hat de'it”, afirma nia.
Iha atividade diálogu ne'ebé kandidatu Horta hala'o iha Aldeia Assanunu, nu’udar no fundadora EBF halai to'o mai iha ne'e, tanba hakarak ko'alia ho prezidente repúblika atu koopera hamutuk ho Governu hodi tau atensaun ba situasaun refere.
Maske iha Aldeia rua ne'e, hari’i ona eskola maibé seidauk asesu ba estrada, no eskola ne'e rasik to'o de'it kalse 3, agora se pasa ba kalse 4, entaun estudante sira tenke ba fali eskola iha suku seluk ne'ebe mak la'o kuaze ho distánsia 6 kilograma (kg).
Maibe kestaun risku ne'ebé mak afeta mós ba estudante sira mak bainhira iha tempu udan, mota tun labarik sira labele ba eskola, dadauk totál estudante iha EBF Asanunu Sulu Sabo, hamutuk 63. Populasaun iha aldeia Asanunu totál 291, no iha aldeia Fatiliri, hamutuk148.
Ba kestaun ne'e, Kandidatu Prezidente Repúblika (PR), José Ramos Horta hatete, nia parte lakohi promete buat barak tanba Governu mak kaer deside programa hodi aprezenta ba Parlamentu Nasionál atu diskute.
“Hanesan ha'u hatete ne'e, ha'u lakohi promete barak tanba Governu mak kaer programa, Governu mak ezekuta programa, Governu mak aprezenta orsamentu iha parlamentu, Governu mak deside programa prioridade, estrada iha ne'ebé-ne'ebé, e buat sira ne'e, maibé prezidente bele ko’alia maka’as, ko'alia klaru ho Governu atu hadi’a moris komunidade iha aldeia ida ne'e”, esplika Horta. (*)
