Tempotimor (Dili)-Prezidente Partidu Linertasaun Popular (PLP), Taur Matan Ruak hatete, nia parte simu orden husi Kandidatu Prezidente Repúblika (PR), períodu 2022-2027, Francisco Guterres ‘Lú Olo’, atu akompaña Sekretáriu Jerál Partidu FRETILIN, Mari Bim Amude Alkatiri, hala'o kampaña segundu volta ba loron dasia iha Tasitolu, Suku Komoro, Postu Administrativu Dom Aleixo, Munisípiu Dili.
“Primeira ha'u hakarak hatete ba ita-boot sira, tanba saida mak ita-nia kandidatu la mai, tanba ha'u akompaña nia dala ida de'it iha Ermera, entaun nia fó orden, nia dehan, Taur Matan Ruak, ita-boot mak tenke akompaña Sekretáriu Jerál ba Tasitolu, ha'u dehan prontu (siap) Komandante”, esplika Taur iha ámbitu kampaña eleitorál husi Kandidatu Lú Olo nian iha Tasitolu, domingu (10/04).
Tanba ne’e, atu fahe informasaun no programa ba militante no apoiante sira, hodi hatutan ba maluk sira sel-seluk, atubele hatene razaun loloos atu vota ba Kandidatu Lú Olo ho númeru sorteu 2.
“Tanba saida mak ita tenke vota ba númeru 2, Primeiru ita hakarak nasaun forte ka la’e?, se imi hakarak nasaun forte, só forte ho kandidatu númeru 2 Lú Olo, tanba saida, nia kuda ai, nia hatene rega, nia hatene tau matan, ida númeru 1 nia fukit, nia silu, nia la kuda, nia sobu, tanba ne'e labele”, afirma nia.
Diretór Kampaña Kandidatu Lú Olo, José Manuel ‘Nakfilak’ hatete, Prezidente Partidu FRETILIN, Francisco Guterres ‘Lú Olo’, konsege ultrapasa situsaun impase polítika ho dame no estabilidade, inklui ultrapasa mós Krize Mundiál pamdemia Covid-19 ne'ebé mak povu la mate barak.
Tanba situasaun Pandemia Covid-19 ne'ebé mak mosu iha rai laran, Prezidente Repúblika, Francisco Guterres ‘Lú Olo’, liuhusi ninia polítika hamutuk ho medida ne'ebé forte husi Governu daualu konstituisionál hodi salva povu ida ne'e konsege atinje óbitu sira iha Timor-Leste iha 130 de'it.
“Kamarada Lú Olo, tanba sá mak ita tenke lori nia ba iha 19 abrik atu ba tur nuudar Prezidente ba rai ida ne'e, tanba primeiru nia konsege ultrapasa impase sira iha Timor ne'e ho dame, ho hakmatek, ho estabilidade ho domin ba ita tomak. Lú Olo hatene ultrapasa krize mundiál ne'ebé mak iha ita-nia rai, la halo povu mate barak liu hanesan iha rai seluk”, afirma nia.
Tanba ne'e bainhidra militante no apoiante sira hili kamarada Lú Olo ba Aitarak laran, mak sei hametin estabilidade iha rai laran hodi lori dezenvolvimentu mai, no lori mudansa ba povu nia moris hamutuk ho ezekutivu ne'ebe mak forte. (*)
