Deputada Partidu Demokrátiku (PD), Elvina de Sousa Carvallo hatete, nia parte retira intervensaun, tanba membru Governu la partisipa iha plenária hodi rona direta intervensaun deputadi sira hodi hatutan ba Ministériu relevante sira.

“Ha'u hanoin, ha'u retira ha'u-nia intervensaun e tau ba aban, maibé la menta tebes laiha prezensa husi membru Governu tanba iha Ministru e iha Sekretáriu Estadu, maibé la konsege, la konsidera Parlamentu Nasionál”, dehan Elvina intervensaun iha Plenária Parlamentu Nasionál, segunda (11/04).

Enkuantu Deputadu CNRT, Leandro Lobato hatete, laiha prezensa  membru Governu sira di'ak liu adia fali intervensaun ba loron tuir mai, tanba laiha reprezentante Governu ne’ebé rona informasaun husi deputadu sira.

“Deputadu sira ne'ebé mak rejista tiha hela de'it ba aban para halo intervensaun”, afirma nia.

Entretantu, Primeriu Vise Parlamentu Nasionál, Maria Angelina Sarmento hatete, enfelismente Governu nia tékniku sira mós laiha ne'ebé bankada ho bankada mak rona filafali.

“Triste tebtebes tanba ita la menta ho situasaun ida ne'e, buat ne'ebé ita hato'o tanba informasaun akumalada durante ne'e e sira laiha prezensa iha ne'e, taun não vaz sentidu, informasaun sira ne'e sei la inkamiña to'o iha governu, ne'ebé ha'u hanoin la efikaz, tanba membru Governu la marka prezensa iha loron ohin”, katak nia.

Tanba ne'e, taka ona sesaun Plenária tanba periódu intervensaun diversas ne'e presizamente Governu nia prezensa para bele rona sira hato'o esklaresimentu ba preokupasaun sira ne'ebé koloka. (*)