“Ha'u nuudar kandidatu ba Prezidente Repúblika iha segundu ronde ida ne'e, hakarak sai Prezidente Repúblika atu garante independénsia juiza sira-nia, garante independénsia Tribunál sira-nian atubele tesi lia tuir lei”, dehan Lú Olo iha dialogu ho apoiante sira iha Munisípiu Vikekée, sesta (08/04).

Nu’udar Kandidatu Prezidente Repúblika ko'alia ne'e tanba dala barak desizaun Tribunál nia hetan kontráriu husi polítiku na'in balun tanba la konkorda ho desizaun ne'ebé tribunál nian.

“Tribunál sira dala barak tesi lia tuir lei, maibé tesi tiha, polítiku balun la konkorda ho desizaun tribunál nian, hodi hatete mós ba juiz sira dehan katak juiz sira halo polítika hotu, sala”, afirma nia.

Ne'e duni, Prezidente Repúblika sei asegura de'it legalidade ida ne'e, atu nune'e bele foti desizaun tuir lei, sé sidadaun la sala, tenke dehan la sala, sé estadu mak sala, tenke dehan estadu mak sala, atu nune'e estadu bele fó indeminizasaun ba nia sidadaun sira.

“Tanba nia (tribunál) mak lia loos tenke loos, e nia sala, nia tenke sala, e tribunál sira tenke halo de'it ida ne'e”, haktuir nia.

Maibé desizaun Tribunál ne'e nu’udar diretu fundamentu ida ne'ebé mak sira fundamenta, no hanoin katak laiha razaun atu púliku sira atu hatete dehan tribunál sira tesi sala lia.

“Ita labele distorsiu, labele halo kleuk tribunál sira-nia kna’ar, tribunál sira-nia desizaun, só tanba de'it desizaun ne'e la favorese ba ita”, afirma nia. (*)