Diretór STAE Baukau, Lucio Salvador Freitas, hatete, STAE halo edukasaun votantes kada suku, koperasaun di’ak ho Xefe Suku inklui Xefe Aldeia mobiliza eleitóres sira atu partisipa, maibé komunidade balun la tau importasia programa refere.
"Eleitóres la fó importansia ba programa edukasaun votante ne'e, ita nia Xefe Aldeia sira aviza sira, sira fó importansia ba sira nia servisu seluk," dehan Lucio iha kna'ar fatin, sesta (08/04).
Faktus hatudu bainhira programa edukasaun votantes segunda volta la'o iha kada suku, hahú abertura eleitóres sira partisipa, maibé atu tama ba programa, eleitóres sira ida-idak la'o fila uma.
Nune'e, ékipa STAE ba tuir iha eleitóres nia uma hodi esplika lala'o edukasaun votantes nian, maibé eletóres sira hatan, vota ne'e fasil.
"Sira dehan ne'e fasil, sira dehan tán funu dala rua ita manan, situasaun difisil ita ultrapasa, saidá mak buat tu'u oan de’it la hatene fali, sé hot-hotu hanoin hanesan ne'e edukasaun votantes ne'e valór laiha, gasta osan ba brigadista sira atu halo edukasaun votantes, mais to'o tereñu ema laiha, ema lakohi importansia ba edukasaun votantes, ne'e signifika prezensa brigadista sira saugate gasta osan de’it," nia argumenta
Dadaun brigadista rekruta husi parte STAE, kontinua ho estratejia tama sai suku hodi implementa programa edukasaun votantes ba eleitóres sira hodi responde ba votu nulu ne'ebé akontese iha eleisaun primeira volta.
Tanba, iha eleisaun Prezidénsial primeira volta, votu abandonadu 17 ho pursentu 0,02, votu nulu 2,035 ho pursentu 2,86, votu branku 595 ho pursentu 0,84, votu reklamadu 93 ho pursentu 0,13, votu rejeitadu 4 ho pursentu 0,01 no totál votu validu hamutuk 68,393 ho pursentu 96,14.
Tanba ne'e, enkoraja eleitór sira atu partisipa edukasaun votantes iha kada Suku, Aldeia nune'e bele reduz votu nulu iha eleisaun Prezidénsial iha segunda volta.
Brigadista ne'ebé destaka iha STAE Baukau hamutuk 125 no tuir planu sei rekruta tán 1.500 poling staf. (*)