“Ministériu Asuntu Parlamentares Komunikasaun Sosiál (MAPKOMS) ho Sekretáriu Estadu Komunikasaun Sosiál (SEKOMS) nia kna’ar prinsipál mak komunikasaun tenke la’o ho di’ak bazeia ba konstituisaun RDTL artigo 40 no artigu 41 kona-ba liberdade impremsa no liberdade espresaun. Orientasaun husi Primeiru Ministru atu asegura liberdade imprensa servisu ho orgaun kompotentei hotu liuliu media entaun atinjimentu prinsipal ne’ebé MAPKOMS iha mak liberdade imprensa aseguradu no laiha jornalista ida mak tama kadeia no mídia ruma hetan julga husi tribunál tamba hala’o sira nia kna’ar”, dehan Ministru Interinu MAPKOMS, Mericio Akara iha Palásiu Governu Dili, Kuarta (06/04).

Tanba tinan 2021 rezultadu survey husi nasaun atusida-ualunulu (180) Timor-leste nia nível rangking iha hitunulu-resin-ida (71) iha rejiaun sudeste aziatiku Timor-leste iha numeru 1 tanba liberdade imprensa aseguradu kompara ho nasaun Indonézia, Málazia, Singapura, Vietnam no nasaun sira seluk.

Iha mós atinjimentu seluk mak Rádiu Televizaun Timor-Leste, Empreza Publika (RTTL,EP) no Ajensia TATOLI,IP sira konsege iha estrutura rasik no jere rasik sira-nia osan. Nune’e mós transferénsia públiku fó ba (RTTL-EP sira konsege dezenvolve no kolabora ho parseiru dezenvolvidu sira ne’ebé apoiu orsamnetu kuaze millaun lima (5 milhões) atu dijitaliza sistema RTTL,EP.

Ministériu Asuntu Parlamentares Komunikasaun Sosiál (MAPKOMS) ho Sekretáriu Estadu Komunikasaun Sosiál (SEKOMS) dezenvolve hela estudu viabilidade ba infrastrutura ba RTTL,EP no Ajensia TATOLI hein katak sei remata antes mandatu hotu.

Ba dadaun ne’e ezekusaun orsamentu MAPKOMS nian to’o ona iha 30,43% ba programa prioridade sira enkuantu iha difikuldade bainhira MAPKOMS implemeta programa sira liliu informasaun HOAX.

“Primeiru trimestre MAPKOMS ninia ezekusaun orsamentu to’o ona iha 30,43%, ne’e liu ona ideal tanba normalmente kada trimestre 25% ami liu oituan ne’ebé diresaun sira uza ho didi’ak sela’e ita ezekuta hotu. Difikuldade mak ita sidadaun balun sempre lansa informasaun ne’ebé HOAX ka liafuan ne’ebé uza mídia sosiál bele estraga sidadaun nia matenek no pensamentu husi ema ne’ebé mak laiha responsavel lansa informasaun falsu sira”, dehan nia.

Governu kolabora ho mídia sira liliu mídia konvensionál sira hamutuk ho Governu kombate informasaun HOAX ka falsu. Tanba informasaun HOAX ka falsu ne’e inimiga Governu, mídia no povu nian, tanba liuhusi informasaun sira ne’e bele halo ema moris iha rumoris, la fiar malu, la respeita malu bele provoka instabilidade.

“Nune’e husu mídia sira atu hamutuk ho Governu hodi halo kampana kombate HOAX. Ida ne’e mak ita hanesan difikuldade maibé sei la sai difikuldade bainhira Governu servisu hamutuk ho sidadaun hothotu konsidera HOAX hanesan inimigu ita hotu nia maibé ita konsege ultrapassa balun no kontinua ba oin”, hatete nia.

Programa prioridade husi MAPKOMS nian iha tinan 2022, sei kontinua realiza infraestrutura ba RTTL,EP no Ajensia TATOLI no sei foku liuba kampaña literasia dijital atu prepara sidadaun ne’ebé iha kapasidade ba utilizasaun plataforma dijitál ba nasaun no família nia di’ak.

Iha mós prioridade seluk mak halo kampaña kombate HOAX maibé halo edukasaun sivika ba sidadaun sira atubele utiliza smart phone (telemovel android), mídia sosiál no uza plataforma hothotu atu promove sidadaun nia poténsia no nasaun ba mundu. (*)