"Ami husi Ekipa Segredo Supreza Dili kompostu husi Posto 4 iha Munisípiu Dili mak hanesan Posto Kristo Rei, Nain Feto, Vera Cruz no Metinaro, Ekipa Segredo Supreza Dili nu'udar ekipa ida ne'ebé mak envolve-an iha ekipa susesu LAT iha Munisípiu Dili iha eleisaun premeiru ronde ba período 2022-2027", dehan Vergilo F. Ximenes, iha Luz Clarita, Formoza, kuarta (06/04).
Ekipa Segredo Supreza Dili hola desizaun konjunta atu fó votu konfiansa ba kandidatu Francisco Guterres ‘Lú Olo’, iha eleisaun segunda volta ne'ebé mak sei akontese iha loron 19 Abril 2022.
“Razaun ami fó votu ba Dr. Fransisco Guterres Lú Olo, nu'udar líder ida ne'ebé mak tane a'as Konstituisaun RDTL, Líder ida ne'ebé mak hametin unidade nasionál, estabilidade no paz iha ita rain. Líder ida ne'ebé sempre promove diálogu, líder ida ne'ebé garantia funsionamentu orgaun Estadu sira seluk”, afirma nia.
Tanba ne'e, Ekipa Segredu ne'e klarifika sei la fó votu ba kandidatu Prezidente Repúblika ne'ebé mak sei ba disolve Parlamentu Nasionál no hamonu Govern, maibé apoiu líder ida ne'ebé moos no kontra korrupsaun, ne'ebé atu hakotu impase polítika iha nia rain.
"Ami konsidera deklarasaun públiku ida hanesan ne'e la respeitu separasaun poder orgaun soberanu sira ne'ebé eziste iha ita-nia rain, no deklarausan públiku ida ne'e hakarak hanaruk krize polítika iha ita-nia rain ne'ebé sei rezulta povu mak sai vítima”, dehan nia.
Ekipa Segredo Munisípiu Dili mai husi partidu sira hanesan FRETILIN, PLP, KHUNTO, CNRT, PD, Os Verdes, nomós organizasaun massa sira hanesan Asosiasaun Movimentu Maubere Oan (AMMO), Movimentu Juventude Dezempregu, Movimentu Juventude Independente, Movimentu Juventude Diferente hamutuk ho organizasaun rezisténsia mak Caixa Unidade no Caixa Uniaun. (*)