“Ohin Rádiu Kmunidade sanulu-resin-lima (15), ofisializa asina kontratu fundu transferénsia públiku ho faze primeiru ho motante osan hamutuk $56,846.75, ba tinan 2022 nian, husi Sekretáriu Estadu Komunikasaun Sosiál (SEKOMS) no Ministru Asuntu Parlamentár Komunikasaun sosial (MAPKOMS)”, dehan Diretór Nasionál Promosaun Dezenvolvimentu Mídia Lokál (DNPDML), José Da Costa, iha salaun ANC, Kaikoli, tersa (05/04).
Ba orsamentu hirak ne'e kategoriza ba sira-nia atividade, programa no proposta ne'ebé haruka ba SEKOMS nian, tanba ne'e ekipa halo avaliasaun hodi transfere fundu tuir ida ne'e.
“Iha estasaun ida ne'e rasik komunidade neen mak hetan montante boot ituan kuaze $15 mill resin, rádiu Coba Taroma, radiu ily-uai Manatutu, Rádiu Povu Vikeké, Rádiu Ermera, Rádiu Bucoli no Rádiu Rai Husar Aileu no Rádiu komunidade Lian Matebian”, informa nia.
Ba Rádiu komunidade hitu (7) mak hetan orsamentu $3 mill resin, no rádiu rua mak hetan $2 mill resin, bazeia ba avaliasaun no tuir mós proposta ne'ebé mai, osan sira ne'e balu atu uza ba hadi'a sira-nia estudiu.
Rádiu Komunidade iha Timor-Leste hamutuk sanulu-resi-hitu (17) hanesan, Rádiu Komunidade Lospalos, Vikeké, Baukau, Bucoli, Manatutu, Oekussi, Maliana, Suai, Same, Maubessi, Aileu, Ermera, Likisá, Ataúru, Komoro, Ainaru no Rádiu Komunidade Difisiénsia, iha momentu ne'e rádiu rua la hetan osan tanba la hatama nia proposta.
Xefe Gabineti Sekretáriu Estadu Komunikasaun Sosiál (SEKOMS), Osório Ximenes hatete, rádiu komunidade sanulu-resin-lima mak simu subsídiu atu tulun sira-nia programa no atividade sira iha estudu no halo kobertura ho di'ak.
“Ita hotu hatene ita-nia nasaun hamrik fiar katak sei iha dezafiu no difikuldade barak, tanba ne'e, Governu iha nia polítika ida atu apoiu subsídiu oituan ba ita-boot sira, ha'u fiar subsídiu ne'e lato'o ba ita sira husu, orsamentu sira tuir proposta no avaliasaun sira ne'ebé iha, tama iha mídia lokál nian”, dehan nia.
Tanba ne’e, husu ba jestór rádiu komunidade sira atu kuidadu uza osan ho responsabilidade ba asuntu ne'ebé mensiona ona iha proposta, tanba osan ne'e bele halo ema monu ida dalan klaran.
“Uza osan ne'e ho responsabilidade hodi hala'o programa ba nune'e bele susesu di'ak, atubele hetan influénsia husi komunidade sira, ikus mai bele hato'o nia relatóriu mai ami”, afirma nia. (*)