“Xefe suku sira uza programa UKL ne'eba politiza tiha, sira dehan programa ida ne'e programa CNRT ninian, ha'u hatete katak la'e la'ós programa CNRT nian, programa ida ne'e programa oitavu Governu nian ne'ebé mak CNRT laiha laran, ida ne'e mak loos”, dehan Vise MAE, Lino de Jesus Torrezão, liuhusi komunikadu imprensa iha nia kna’ar fatin, Kolmera, segunda (04/04).
Tanba ne'e, Ministériu Administrasaun Estatal hakarak halo klarifikasaun polítika, hodi responde mós ba deklarasaun bankada CNRT ninian, kona-ba programa oitavu Governu nian, liliu ba apoiu ba lideransa komunitáriu sira iha suku 452, nomós kona-ba uma kbi'it la'ek.
Nu’udar Vise Ministru Administrasaun Estatal, hakarak dezmente ho ninia foto ne'ebé mak sai polemika iha públiku, maibé foto ida ne'e laloos.
Tanba foto ne'ebé mak iha ne'e, ema balun mak uza foto kampaña ninian no karreta tau Bandeira FRETILIN hodi edit hamutuk ho foto ne'ebé mak sira hala'o hela enkontru lideransa komunitáriu iha Oeleu.
“Ha'u ba la halo kampaña, ha'u ba ne'eba hatete klaru katak ha'u ba enkontru ho lideransa komunitáriu, kompostu husi Xefe suku, xefe aldeia, delgadu ho delgada sira, reprezentante feto mane, sira ne'e mak marka prezensa iha ne'eba, para ha’u atu haklaken loloos, programa Governu ne'ebé mak viabilizadu e depois ninia lideransa másimu mak Jenerál Taur Matan Ruak”, afirma nia.
Tanba ko'alia kona-ba lideransa komunitáriu ida, bainhira nia hala'o kna’ar, la tuir lei númeru 9/2016, mak Ministériu Administrasaun Estatál iha kompeténsia tomak atu fó orientasaun no bolu sira hodi halo reuniaun alargada ida atu haklaken lialoos ba sira, para sira bele hatene.
Ba pozisaun MAE deside hala'o reuniaun ho lideransa komunitáriu sira, tanba bazeia ba faktu no informasaun iha 24 janeiru 2022, partidu CNRT konvida xefe suku 15 hodi mai iha Dili, toba iha Funan Buras, maibé ministériu rasik lahatene sira mai halo saida.
“Hanesan Xefe suku sira ne'e mai halo saida, e sira (CNRT) mak iha Governu atu bolu Xefe suku sira mai, ne'e lalos, se mak bolu xefe suku sira atu tun mai hamutuk iha Dili laran ne'e so Ministériu Administrasaun Estatal, nia mak iha kompeténsia tomak atu bolu Xefe suku sira mai iha Dili”, esplika nia.
Maibé felismente nu’udar Membru Governu la simu bainhira Xefe suku sira uza programa UKL ne'e ba politiza tiha katak programa ne'e CNRT nian.
Bainhira CNRT vota kontra OJE iha 2020, Governu ida ne'e mós hetan kedas viabiliza husi FRETILIN, no komesa halo ona planu liliu halo programa.
Tanba ne'e, planu ne'ebé agora iha ne'e, nu’udar Ministériu Administrasaun Estatál ninia planu programa, no sub-programa ida ne'ebé mak Diresaun Jerál Dezenvolvimentu Rurál, hamutuk ho Sekretariadu Tékniku PNDS ninian, mak ezekuta tun ba kraik.
Durante plataforma partidu FRETILIN no PLP ho KHUNTO iha Governu ida ne'e, seidauk politiza programa ne'e, no sempre fó duni kbi'it la'ek, laharee ba rasa ka kór, maibé buat ne'ebé Governu la simu mak ema politiza fali programa ida ne'e.
“E xefe suku no konsellu suku balun, komesa dor to dor, hatete dehan programa ida ne'e programa CNRT ninian, bainhira imi mak vota kontra ba kandidatura ida ne'e mak imi haree, imi sei selu filafali impostu fula-fulan se kuandu imi vota sala, ha'u dehan ida ne'e buat ida ke laloos”, esplika nia.
Tanba ne'e, Ministeriu Administrasaun Estatal hakarak fó hanoin katak nu’udar liman ain ba Governu ida ne'e, tenke koopera ho Governu, tanba Governu ida ne'e mak hatuun programa ba kraik, tanba ne'e Xefe suku sira labele sai fali opozisaun ba Governu.
“Se sai opozisaun ba Governu hatete de'it, tenke ser dada-an sai, fó ema seluk atu servisu hamutuk ho Governu, ida ne'e laiha ida ameasa, liafuan ameasa ne'e oinsá, la ameasa, ameasa ne'e foti kilat tiru mate ema ka. Ami hatete de'it bainhira la koopera ho Governu, Governu sei hola pozisaun, tanba saida, o kontra Governu, no kontra programa Governu nian”, haktuir nia.
Ho ida ne’e, MAE haree katak programa UKL ne'e, envolve mós infraestrutura báziku sira ne'ebe mak tama hotu iha laran, tanba atu ko'alia kona-ba rekoperasaun ekonomika ne'ebé mak agora dadauk iha ne'e.
“Ho programa UKL ne'e ha’u hakarak atu hatete rekooperasaun ekonomika ne'e sa'e, ninia forsa traballu ne'e atinje to'o 25 mil, kuandu iha tempu ita halo rekooperasaun ekonómika, ne'e kria kampu traballu ba ema, e ha'u atu hatete loloos katak ne'e la politiza”, dehan nia. (*)
